İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 281 Hüküm no: 180 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Mustafa Bey b. Süleyman ile Hüseyin b. Çelebi b. Mehmed’in alacak-verecekden dolayı birbirlerinin zimmetlerini ibra ettikleri
Mahmiye-i İstanbul’da Edirnekapısı kurbünde Çakır Ağa mahallesi ahâlîsinden olup İhtisâb mukāta‘asında olan kul oğlanlarının terâzibaşılarından Mustafa Bey b. Süleyman nâm kimesne meclis-i şer‘-i şerîf-i enverde mahalle-i mezbûre sükkânından olup yine tâife-i mezbûreden işbu râfi‘u’l-kitâb Hüseyin Çelebi b. Mehmed nâm kimesne mahzarında ikrâr-ı tâm ve takrîr-i kelâm edip bin doksan üç senesi şehr-i Rebî‘ülevvel’inin on yedinci günü merkūm Hüseyin Çelebi silk-i mülkünde münselik olup mahalle-i mezbûrede vâki‘ bir tarafdan âhar mülkü ve iki tarafdan Meydâncı zimmî mülkü ve bir tarafdan tarîk-i âm ile mahdûd bir bâb tahtânî oda ve bir hamam ve bir câmekân ve bir bi’r-i mâ ve bir kenîf ve zât-ı eşcâr-ı müsmire ve gayr-ı müsmire bahçe ve havlu ve harem duvarını müştemil mülk menzilini zâhiren bey‘ olup hakīkatde kendi mülkünde bâkī olmak üzere bi-tarîkı’l-muvâza‘a benim için Mustafa Bey’e sekiz yüz guruşa bey‘ u teslîm ve semen-i merkūm sekiz yüz guruşdan bir akçe ve bir habbe kabz etmemişiken semen-i mezbûru yedinden tamamen ahz u kabz ve teslîm eyledim deyü târih-i mezbûrda şer‘iyâtî Mehmed Müstakīm Efendi huzûrunda kâziben ikrâr edip işbu hüccet tahrîr olunmuşidi. Hâlâ mezbûr Hüseyin bey‘-ı mezbûr vech-i meşrûh üzere muvâza‘aten olduğundan mâ‘adâ semen-i merkūm sekiz yüz guruşu tamamen ahz u teslîm eyledim deyü ikrâr-ı mezkûrunda kâzib olmağla menzil-i mahdûd-ı mezkûru benden taleb ve da‘vâ etmekle ben dahi kendi rızâmla menzil-i mahdûd-ı mezbûrdan kasr-ı yed edip husûs-ı mezkûra müte‘allika âmme-i da‘vâdan mezbûr Hüseyin Çelebi’nin zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledim min-ba‘d menzil-i mezbûra ve semen-i merkūma müte‘allika mezbûr Hüseyin Çelebi ile da‘vâ ve nizâ‘ım kalmadı dedikde mezbûr Mustafa Bey’in ber-vech-i muharrer cârî ve sâdır olan cemî‘-i kelimâtı mezbûr Hüseyin Çelebi vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu.
Fi’l-yevmi’s-sâdis ve’l-ışrîn min-şehri Ramazani’l-mübârek li-sene seb‘a ve mie ve elf.
Şuhûdü’l-hâl: Fahrü’l-kuzât Mustafa Efendi Nâib-i recül, Arzuhâlci Mehmed Çavuş b. Abdurrahman, Osman Efendi sâkin-i Filyokuşu, Hasan Efendi b. Nasuh Sicn en-Nevbetî, Mustafa Çelebi b. Mehmed Yiğitbaşı, el-Hâc Süleyman b. Mehmed Yiğitbaşı, Şaban b. Abdi, İbrahim Çelebi b. Ahmed.
|