İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 284 Hüküm no: 182 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vezneciler Çarşısı’nda kapalı olan ekmek fırının ihtiyaca binaen yeniden açılıp ekmek imal ettirilmesine dair İstanbul kadısına hüküm Akzâ kuzâtü’l-Müslimîn evlâ vülâti’l-muvahhidîn ma‘denü’l-fazl ve’l-yakīn râfi‘ü i‘lâmi’ş-şerî‘ati ve’d-dîn vârisü ulûmü’l-enbiyâ’i ve’l-mürselîn el-muhtassu bi-mezîd-i inâyeti’l-meliki’l-mu‘în Mevlânâ İstanbul kadısı zîde fezailehû tevkī‘-i refî‘-i hümâyûn vâsıl olucak ma‘lûm ola ki mahrûse-i İstanbul’da müteveffâ Gümrükî Hüseyin Paşa veresesi tasarruflarında olup Sultân Bâyezid Han Câmi‘-i şerîfi kurbünde vâki‘ Vezneciler sûkunda olan mu‘attal habbâz fırınının keyfiyeti fermânım olduğu üzere vukūf-ı tâmmı olan bî-garaz Müslimînden suâl olundukda fırın-ı mezbûrda mukaddemâ <> hâs ekmek tabh oluna gelip iki sene mukaddem müste’cirleri medyûn olmağla gaybet ve firâr edip fırın-ı mezbûr kapanıp ve mu‘attal olmuşidi deyü herbiri [62b] haber verdiklerinden mâ‘adâ verese-i mezbûrûn yedlerinde olan hüccet-i şer‘iye ve evâmir-i şerîfe mukaddemâ fırın-ı mezbûrda hâs ekmek tabhına izn verildiğin nâtık olup ve fırın-ı mezbûrdan mâ‘adâ kurbünde vâki‘ Darbhâne fırını ve Kemeraltı fırını dahi kapanıp ve Şeyh Ebulvefâ fırını muhterik olup iskemleleri mu‘attal olmağın hâlâ fırın-ı mezbûr açılıp kemâ-fi’l-evvel sâir hâs ekmek fırınları tabh olunan vech üzere hâs ekmek tahb olunmak ol havâlîde sâkin ibâdullâh hakkında her vechile evlâ ve enfa‘ olduğunu i‘lâm eylediğin ecilden müceddeden nizâm verildiği üzere kerestesi gāyet pâk ve hâlis olmak üzere fırın-ı mezbûrda dahi harcî ekmekden on dirhem noksanıyla hâs ekmek tabh etdirilmek emrim olmuşdur buyurdum ki hükm-i şerîfimle vusûl buldukda bu bâbda sâdır olan emrim üzere amel eyleyip dahi müceddeden nizâm verildiği üzere kerestesi gāyet pâk ve hâlis olmak üzere fırın-ı mezkûrda dahi harcî ekmekden on dirhem noksanıyla hâs ekmek tabh etdirip emr-i şerîfimin mazmûn-ı münîfi ile âmil olasın şöyle bilesin alâmet-i şerîfeme i‘timâd kılasın. Tahrîren fî evâil-i Şa‘bân sene seb‘a ve mie ve elf. El-mahmiye-i Kostantıniyye