İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 285 Hüküm no: 183 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mercan mahallesinde vefat eden Şehabeddin Halife’ye ait olup Müderris İbrahim b. Yusuf’a temlik edilen evin hudutlarının tespiti Tırâzende-i serîr-i cihân-bânî firâzende-i livâ-yı sahib-kırânî hudâvend-i tâc-bahş-ı efser-i rubâyî cihândâr-ı add ü pend-i kişver-güşâyî sultân-ı a‘zam şehin-şâh-ı mu‘azzam el-müeyyedü mine’s-semâ’ el-muzafferü ale’l-a‘dâ el-leysü’l-hassâr ale’l-eşrâr el-mugīsü’l-midrârı ale’l-ahyâr kehfü’l-berâyâ fâizü’l-mezâyâ kāmûsu bahri’l-cûd ve’l-kerem fâizu emtâri’l-lutfi ale’l-ümem râfi‘ü râyâti’l-İslâm ilâ zirveti’l-kemâl hâfıdu a‘dâ’illâhi ilâ hazîzı’l-kahri ve’l-ezlâl hâmî-i havzeteyi’d-dîni ve’d-dünyâ mazharu kelimâti’llâhi’l-ulyâ bâsıtu ecnihati’l-emni ve’l-emân el-mütteki’u bi-müttekâ’i “İnnallâhe ye’muru bi’l-adli ve’l-ihsân” el-âmiru li-ibâdullâhi bi-ikāmeti’n-nefli ve’l-farz el-müşerrefü bi-teşrîfi “Hüve’llezî ce‘aleküm halâ’ife fi’l-arz” seyfu savletihî lâ bi-elfi’l-kurâb muzî’en ve nâru şevketihî lâ yahmedühe’l-Furât zükâ’en lâ-zâlet râyâtü saltanatihî alâ kubbeti’s-simâki madrûbeten ve âyâtü ma‘deletihî fî cebheti’l-Eflakī mektûbeten ve elsinetü seyfihî ve sinânihî bi’l-fethi ve’n-nasri nâtıkaten ve sehâbu cûdihî ve ihsânihî alâ ruûsi’l-enâmi dâfikaten hazretleri ulemâya rağbet buyurmalarıyla ulemâdan fahrü’l-müderrisîni’l-kirâm zübdetü’l-muhakkıkīni’l-fihâm İbrahim Efendi b. Yusuf Haremeyn Muhâsebesi’nde başhalîfe olup mahmiye-i İstanbul’da Saray-ı atîk kurbünde Mercan mahallesinde sâkin iken bilâ-vâris fevt olan Şehabeddin Halîfe’nin menziline bâ-hatt-ı hümâyûn temlîk buyurmalarıyla üzerine varılıp ba‘de’l-keşf ve’l-mu‘âyene hudûd ve müştemilâtı tahrîr ve hüccet olunmak bâbında Âsitâne-i Sadâret-i uzmâ ve Vekâlet-i kübrâ kāimmakāmı olan vezîr-i âlîşân düstûr-ı âsaf-nişân râkibu hubûli’l-izzü ve’l-ikbâl sahibü züyûli’l-mecdü ve’l-iclâl el-mahfûfu bi-sunûfi’l-meliki’l-müte‘âl sa‘âdetlü Osman Paşa yesserallâhu te‘âlâ mâ yürîd ve mâ yeşâ’ hazretleriyle bu fakīre ve şıkk-ı evvel defterdârı vekîli umdetü erbâbü’t-tahrîr ve’l-kalem zübdetü ashâbi’t-tastîr ve’r-rakām Ali Efendi’ye hitâben emr-i şerîf-i cihân-mutâ‘ sâdır olmağın imtisâlen-leh kıbel-i şer‘den irsâl olunan İbrahim Efendi b. Mehmed el-Hamîdî ve vezîr-i müşârün-ileyh tarafından ta‘yîn olunan Ali Ağa ve mûmâ-ileyh Ali Efendi ile zikrolunan Mercan mahallesinde vâki‘ menzil-i mezbûrun üzerine varıp mûmâ-ileyhâ Ali Ağa ve Ali Efendi ve mahalle-i mezbûre imâmı es-Seyyid Mehmed Efendi ve müezzini ve sâir kitâbda muharrerü’l-esâmî Müslimîn ile menzil-i mezbûr keşf ve mu‘âyene olundukda bir tarafdan Sart hamamı ve bir tarafdan Canfeda vakfı olan odalar ve bir tarafdan tarîk-i âm ve bir tarafdan tarîk-i hâs ile mahdûd olup tabaka-i ulyâda bir kârgir oda ve bir sofa ve dehliz ve kurbünde bir kebîr sofa ve dehliz ve bir sagīr oda ve kenîf ve orta tabakada iki bâb oda ve bir kârgir hazîne odası ve bir kârgir kebîr oda ve mahzen ve ahır ve eşcâr-ı müsmire ve gayr-ı müsmireli bahçe ve köşk ve havuz-ı kebîr ve fıskıye ve havlu ve üç su kuyusunu müştemil bulunmağın vâki‘ hâli mevlânâ-yı mezbûr mahâllinde ketb u tahrîr ba‘dehû ma‘an irsâl olunan İbrahim b. Mehmed ve Mehmed b. Hüseyin ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Tahrîren fi’l-yevmi’s-sânî ve’l-ışrîn min-şehri Ramazani’l-mübârek li-sene seb‘a ve mie ve elf. Şuhûdü’l-hâl: Ebûbekir Efendi b. Hasan, İbrahim Çelebi b. İsmail, Ömer Ağa b. Mehmed, İbrahim Çelebi b. Yunus, Ali Çelebi b. Mehmed, Mehmed Çelebi Takvâ, İbrahim Çelebi b. Ahmed, Ali Çelebi b. Bayram, Mehmed Çelebi b. Mehmed, Hasan Çelebi b. Hüseyin, Mehmed b. Abdurrahman ve gayruhum mine’l-huzzâr. [63a] El-emru kemâ zükire fîhi nemekahü’l-abdü’l-fakīr ileyhi Sübhânehû ve te‘âlâ Abdullah el-müvellâ hilâfeten bi-mahkeme-i Ahîçelebi bi-medîne-i Kostantıniyye gufira leh.