İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 286 Hüküm no: 184 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Yani v. Kiryako’nun alacağını ödemesi için Pandeli v. Veşanci’ye tenbih olunduğu Tüccâr tâifesinden işbu bâ‘is-i hâze’s-sifr Yani v. Kiryako nâm zimmî meclis-i şer‘-i hatîrde mellâh tâifesinden Pandeli v. Vişancı nâm zimmî muvâcehesinde üzerine da‘vâ ve takrîr-i kelâm edip mezbûr Pandeli zimmetinde târih-i kitâbdan bir sene mukaddem yedimden iştirâ ve tesellüm eylediği vezn [ve] mikdârı beynimizde ilm-i şer‘î ile ma‘lûm ketân bahâsından yetmiş yedi guruş hakkım olup hâlâ taleb eylediğimde teslîmden imtinâ‘ eder suâl olunup meblağ-ı mezbûru bana def‘ u teslîme tenbîh olunmak matlûbumdur dedikde gıbbe’s-suâl mezbûr Pandeli cevâbında müdde‘î-i merkūm Yani’nin takrîr-i meşrûhu üzere olup mârrü’z-zikr keten bahâsından yetmiş yedi guruş zimmetinde edâsı lâzım müdde‘î-i merkūma deynim vardır deyü tav‘an ikrâr u i‘tirâf etmeğin mûcebiyle meblağ-ı mezbûru müdde‘î-i merkūm Yani’ye def‘ u teslîme mezbûr Pandeli’ye tenbîh olunup mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min-şehri Şa‘bâni’l-mu‘azzam li-sene seb‘a ve mie ve elf min-hicreti men lehu’l-izzü ve’ş-şeref. Şuhûdü’l-hâl: Ebûbekir b. Hüseyin, Receb Çelebi b. Osman, İsmail Çelebi b. Mustafa, Hüseyin b. Hasan, Sarı Hasan