.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 107
Hüküm no: 104
Orijinal metin no: [16a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Vefât eden Mehmed b. Numan’ın vârislerine kalan çiftlik, çayır ve tarlalarını el-Hâc Halil Ağa’ya sattıkları

Vilâyet-i Rumeli’nde Ohri kazâsına tâbi‘ Durine nâm karye ahâlîsinden olup bundan akdem müteveffâ olan Mehmed b. Numan’ın verâseti vâlidesi Sâliha bt. Yahya ve li-ebin kız karındaşı Fâtıma bt. Numan nâm hatunlara münhasıra olduğu şer‘an sâbit ve müte‘ayyen oldukdan sonra mezbûre Fâtıma’nın zevci ve husûs-ı âtîye vekîli olup mezbûreyi ma‘rifet-i şer‘iyye ile ârifân olan Hüseyin Bey b. Sefer Ağa ve Mehmed Çelebi b. Mustafa Çavuş nâm kimesneler şehâdetleriyle vekâleti sâbite olan İsa b. Koçu nâm kimesne mahfil-i şer‘-i şerîfde mezbûre Sâliha’nın zevci ve husûs-ı âti’z-zikre vekîli olup mezbûreyi ma‘rifet-i şer‘iyye ile ârifân olan Mehmed Ağa b. Mustafa Çavuş ve Mustafa Bey b. Osman nâm kimesneler şehâdetleriyle vekâleti sâbite olan Seyyid Ahmed b. Seyyid Mustafa muvâcehesinde bi’l-vekâle ikrâr-ı tâm ve bast-ı merâm edip müteveffâ-i mezbûrun karye-i mezbûre sınırı dâhilinde mevâzi‘-i adîdede vâki‘ bir pulluk sabana kifâyet eden ma‘lûmü’l-hudûd tarlalarını mezbûrât Sâliha ve Fâtıma tapu ile almada nizâ‘ları olup ve yine müteveffâ-i mezbûrun karye-i mezbûrede vâki‘ ma‘lûmü’l-hudûd büyût-ı müte‘addid ve ahır ve ahır odasını hâvî menzil ve bir kıt‘a bağ ve mevâzi‘-i adîdede vâki‘ ma‘lûmü’l-hudûd çayırları dahi taksîmde nizâ‘ları olmağın zikr olunan tarlaları ma‘rifet-i sâhib-i arzla el-Hâc Halil Ağa nâm kimesneye yirmi dokuz bin beş yüz akçeye ferağ ve tefvîz ol dahi tefevvüz ve kabûl eyleyip ve zikr olunan menzil ve bağ [16b] ve çayırları safka-i vâhide ile on iki bin akçeye bey‘-i bâtt-ı sahîh-i şer‘î ile bey‘ ol dahi iştirâ ve kabûl eyledikden sonra cem‘an kırk bir bin beş yüz akçeyi mezbûrun yedinden ahz u kabz edip nısfı mezbûr Fâtıma’nın ve nısf-ı âharı mezbûre Sâliha’nın olmak üzere herbiri vekâleten ahz u kabz edip min-ba‘d müvekkilem mezbûre Fâtıma’nın zikr olunan emlâke ve sâir eşyâya müte‘allika mezbûre Sâliha ile da‘vâsı kalmamışdır, da‘vâ dahi ederse lede’l-hükkâmi’l-kirâm istimâ‘ olunmasın dedikde gıbbe’t-tasdîk mâ-vaka‘a sebt olundu. Tahrîren fi’s-sâbi‘ aşer min-Şevvâli’l-mükerrem li-sene selâse ve sittin ve elf.

Eş-şuhûdü’s-sâbık.