İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 287 Hüküm no: 185 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcundan dolayı hapiste olan Pandeli v. Vişanc’nın alacaklısı Yani v. Kiryako’nun alacağının bir kısmını devletin ödemesi üzerine Yani’nin kalan alacağından vazgeçtiği İşbu sene-i mübârekede es-sadakatü tereddü’l-belâ ve tezîdü’l-ömr mazmûnu ile amel buyurulup 35 guruş ihrâz-ı rızâ-yı melik-i Gaffâr ve isticlâb-ı ed‘iyye-i hayriye-i ashâb-ı ıztırâr için tesâdduk buyurulmağla sicn-i sultânîde düyûn-ı müsbite için hücec-i şer‘iye mûcebince haklarının bir mikdârını taraf-ı mîrîden tesâdduk ve ihsân olunan meblağdan ahz ve bâkī haklarından medyûnlarının zimmetini ibrâ ve ıskāt etmeleriyle husûs-ı âti’z-zikre mahâllinde ketb u tahrîr için bâ-fermân-ı âlî kıbel-i şer‘den irsâl olunan Ebûbekir Efendi mahmiye-i İstanbul’da vâki‘ Baba Cafer zindânına varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde işbu derûn-ı hüccetde mastûrü’l-ism olan Yani v. Kiryako nâm zimmî meclis-i ma‘kūd-ı mezbûrda medyûn-ı merkūm Pandeli v. Vişancı muvâcehesinde ikrâr-ı tâm ve takrîr-i kelâm edip işbu derûn-ı hüccetde mastûr olan deyn-i mezkûr yetmiş yedi guruşun yirmi beş guruşunu ber-vech-i muharrer tesâdduk ve ihsân olunan meblağdan ahz u kabz edip mâ‘adâsı olan elli iki guruş da‘vâsında medyûn-ı merkūm Pandeli’nin zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledim dedikde vâki‘ hâli mezbûr Ebûbekir Efendi mahâllinde tahrîr ba‘dehû ma‘an ba‘s olunan Ali b. Bali ve Mehmed b. Receb ile meclis-i şer‘a gelip alâ vukū‘ihî haber vermeğin mâ vaka‘a bi’t-taleb ketb olundu. Fi’l-yevmi’s-sânî aşer min-şehri Ramazani’l-mübârek li-sene seb‘a ve mie ve elf. Şuhûdü’l-hâl: Ebûbekir Ağa el-Mübâşir, Veznedâr Ali Çelebi, es-Seyyid Şükrullah Efendi, es-Seyyid Hasan Efendi, es-Seyyid Ali Çelebi.