İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 288 Hüküm no: 186 Orijinal metin no: [63a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahman b. Abdülfettah’ın varislerinin mûrislerinin Yorgo v. Gomi’de alacağı olduğu iddiasıyla Yorgo’nun varislerine açtıkları davanın zaman aşımı nedeniyle reddedildiği Havâss-ı Aliyye kazâsına tâbi‘ Bihor nâm karye sükkânından iken bundan akdem vefât eden Abdurrahman b. Abdülfettah nâm kimesnenin verâseti sulbiye kızları Cennet ve Emine nâm hatunlara münhasıra olup ba‘dehû mezbûre Cennet dahi fevt olup verâseti sadrî kebîr oğlu İbrahim b. Hüseyin’e münhasıra olduğu şer‘an zâhir ve müte‘ayyen oldukdan sonra mezbûr İbrahim ile zâtı ma‘rifet-i şer‘iye ile ârifân Abdi Beşe b. Hüseyin ve Mehmed Çelebi b. Abdullah ta‘rîfleriyle mu‘arrefe olan Emine dîvân-ı hazret-i sadrazamîde ma‘kūd meclis-i şer‘-i şerîf-i enverde kazâ-i mezbûra tâbi‘ Bergos nâm karye-i mezbûrede bundan akdem hâlik olan Yorgo v. Köni nâm zimmînin sulbî oğulları Papa Trandafilo ve Todoş nâm zimmîler muvâcehelerinde üzerlerine da‘vâ ve tasvîr-i müdde‘â edip mûrisimiz mezbûr Abdurrahman’ın cihet-i deyn-i şer‘îden merkūm Yorgo zimmetinde hâl-i hayatlarında kırk beş bin akçe hakkı olup kable’l-ahz ve’l-edâ mezbûrândan herbiri fevt olmağla meblağ-ı mezbûr ırsen bize <> isâbet etmekle meblağ-ı mezbûru merkūm Yorgo’nun terekesinden taleb ederim suâl olunsun dediklerinde gıbbe’s-suâl mezbûrân Papa Trandafilo ve Todoş cevâblarında husûs-ı mezbûru bi’l-külliye inkâr eylediklerinden mâ‘adâ müdde‘iyân-ı mezbûrânın mûrisleri merkūm Abdurrahman otuz beş sene mukaddem fevt ve bizim babamız merkūm Yorgo otuz sene mukaddem hâlik olup karyeteyn-i mezbûreteyn birbirine mülâsık olmağla müdde‘iyân-ı mezbûrân İbrahim ve Emine dâimâ bizimle mülâkī olurlar lâkin seneteyn-i mezbûreteynde bizi meblağ-ı mezbûra müte‘allika asla bir nesne da‘vâ etmeyip otuz sene bilâ-özr-i şer‘î sükût etmişdir demeleri ile gıbbe’l-istintâk müdde‘iyân-ı mezbûrân İbrahim ve Emine fi’l-hakīka mûrisleri mezbûr Abdurrahman otuz beş sene mukaddem fevt ve merkūm Yorgo otuz sene mukaddem hâlik olup karyeteyn-i mezbûreteyn birbirine mülâsık olmağla dâimâ mezbûrânla mülâkī olur iken sinîn-i mezbûrdan beri meblağ-ı mezbûra müte‘allika asla bir nesne da‘vâ etmeyip otuz sene bilâ-özr-i şer‘î sükût eylediklerin ikrâr u i‘tirâf etmeleri ile on beş sene bilâ-özr-i şer‘î terk olunan da‘vânın bilâ-emr-i şerîf istimâ‘ı memnû‘ olmağla müdde‘iyân-ı mezbûrân İbrahim ve Emine bilâ-emr-i şerîf bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sânî min-şehri Ramazani’l-mübârek li-sene seb‘a ve mie ve elf. Şuhûdü’l-hâl: Zübdetü ashâbi’t-tastîr ve’r-rakām Tezkire-i sânî Mehmed Efendi, fahrü’l-eşbâh ve’l-a‘yân Yusuf Bey Ser-çavuşân, fahrü’l-akrân Muhzır el-Hâc Mehmed Ağa b. Abdullah, el-Hâc Mehmed Çavuş, umdetü erbâbü’t-tahrîr ve’l-kalem Tezkire-i evvel Mustafa Efendi, Mehmed Ağa b. Abdullah, Abdi Beşe b. Mehmed, Halil Efendi b. Mehmed, Abdullah b. Abdurrahman, Ali Beşe b. Abdullah, Sinan Çelebi b. Ali.