İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 289 Hüküm no: 187 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hızır b. Hüseyin’in vefat eden Gümüş Ali Bey’e olan borcunu varislerine ödemesi Medîne-i Kayseriye’de Lala mahallesi sükkânından iken bundan akdem vefât eden Gümüş Ali Bey b. Ahmed b. Ali nâm kimesnenin verâseti zevce-i metrûkesi Şerife Havva nâm hatun bt. Ahmed Efendi b. Mahmud Efendi ile sulbî sagīr oğlu Ali ve sagīre kızı Şerife Müşerrefe’ye münhasıra olduğu şer‘an zâhir ve müte‘ayyen oldukdan sonra mezbûre Şerife Havva Hatun ile sagīrân-ı mezbûrânın cedleri ve vasîleri mezbûr Ahmed Efendi taraflarından husûs-ı âti’z-zikre vekîl-i müsecceli olan Ahmed Bey b. Abdülhay nâm kimesne meclis-i şer‘-i şerîf-i enverde fi’l-asl medîne-i mezbûre ahâlîsinden olup hâlâ mahmiye-i İstanbul’da Mollahüsrev mahallesinde sâkin el-Hâc Hızır b. Hüseyin nâm kimesne mahzarında bi’l-vekâle üzerine da‘vâ ve takrîr-i kelâm edip müteveffâ-yı mezbûr Gümüş Ali Bey’in gāib ani’l-meclis sâbıkā Türkmen Ağası Abaza İsmail Ağa zimmetinde cihet-i deyn-i şer‘îden altı yüz guruş hakkı olup meblağ-ı mezbûra Abdi Ağa nâm kimesne kefâlet-i sahîha-i şer‘iyye ile kefîl oldukdan sonra mezbûr Ali Bey meblağ-ı mezbûru kable’l-ahz fevt olmağla ırsen verese-i mezbûrûna isâbet etmekle meblağ-ı mezbûru merkūm Abdi Ağa’dan kefâletine binâ’en taleb ve da‘vâ eylediğimde ol dahi meblağ-ı mezbûrun üç yüz guruşunu bana edâ ve teslîm edip ben dahi ahz u kabz eylediğimde mezbûr el-Hâc Hızır meblağ-ı mezbûr üç yüz guruşun yüz elli guruşunu benim yedimden bi-gayr-ı hakkın ahz u kabz etmiştir hâlâ suâl olunup meblağ-ı [mezbûr] yüz elli guruşu bana red ve teslîme mezbûr el-Hâc Hızır’a tenbîh olunmak matlûbumdur dedikde gıbbe’s-suâl mezbûr el-Hâc Hızır cevâbında ben müteveffâ-yı mezbûr ile vücûh-ı ticârette şerîkler olmağla gāib-i merkūm Abaza İsmail Ağa zimmetinde olan altı yüz guruşun nısfı müteveffâ-yı mezbûr Ali Bey’in ve nısf-ı âhırı benim mülk ve hakkım olup kable’l-fesh-i akdi’ş-şirke mezbûr Ali Bey fevt olmağla müdde‘î-i mezbûrun makbuzu olan üç yüz guruşun yüz elli guruşunu kendi hakkım olmak üzere ahz u kabz etmiş idim deyü da‘vâyı def‘ edicek gıbbe’l-istintâk ve’l-inkâr mezbûr el-Hâc Hızır’dan sıdk-ı makā[lına] beyyine taleb olundukda ityân-ı beyyine içün istimhâl etmekle kirâren ve mirâren mehl-i şer‘î birle ba‘de’l-imhâl ityân-ı beyyineden bi’l-külliye izhâr-ı acz etmeğin mevkūfen ale’l-yemîn mûcebiyle meblağ-ı mezbûr yüz elli guruşu müdde‘î-i mezbûra red ve teslîme mezbûr el-Hâc Hızır’a tenbîh [ile] mâ-hüve’l-vâki‘ bi’t-taleb ketb olundu. Fi’l-yevmi’l-ışrîn min-şehr-i Ramazani’l-mübârek li-sene seb‘a ve mie ve elf. Şuhûdü’l-hâl: Osman Çavuş b. Mehmed el-mübâşir, el-Hâc Receb b. el-Hâc Derviş, Hasan b. İsa, es-Seyyid Halil Çelebi b. es-Seyyid Hasan, es-Seyyid Abdurrahim b. Ömer, Mahmud b. Mustafa, Ebûbekir Bey b. Ali, es-Seyyid Hasan b. el-Hâc Ahmed, Abdülhalim b. Mehmed, el-Hâc İbrahim b. el-Hâc Ali, el-Hâc Mehmed b. el-Hâc Mustafa, es-Seyyid el-Hâc Ahmed b. es-Seyyid Şerif, İbrahim Çelebi b. Ahmed, Sunullah Efendi el-müderris, Mahmud Efendi el-kadı, Kasım Çelebi b. Bekir, el-Hâc veli b. ( ) İbrahim Çelebi b. ( )