İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 290 Hüküm no: 188 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Reis’in İsmail kasabasından Hasan Ağa adına İstanbul’a taşıdığı zahîrenin kira bedelini aldığı Sefîne reislerinden Tophâneli el-Hâc Mehmed Reis b. el-Hâc Mustafa nâm kimesne meclis-i şer‘-i şerîf-i enverde hâlâ İsmail kasabasında mütevellî olan umdetü’l-a‘yân el-Hâc Hasan b. Mustafa tarafından husûs-ı ati’z-zikre vekîl olduğu mahmiye-i İstanbul’da Pirinçci Sinan mahallesinde sâkin Mehmed Ağa b. Şaban ve Ali Ağa b. İbrahim şehâdetleriyle sâbit olan Abdullah Çelebi b. Abdullah nâm kimesne mahzarında ikrâr-ı tâm ve takrîr-i kelâm edip târih-i kitâbdan dört ay mukaddem müvekkil-i mezbûr el-Hâc Hasan Ağa şayka ta‘bîr olunur sefînem ile mahmiye-i mezbûreden kasaba-i İsmail iskelesine varıp andan der-anbâr olan şa‘îrinden sefîne-i mezbûreye ma‘lûmü’l-mikdâr şa‘îr tahmîl ve mahmiye-i mezbûreye getirip nakletmek içün zikrolunan şa‘îrin her keyline on altışar akçe navl kavli ile müddet ta‘yîn etmeksizin sefîne-i mezbûreyi istîcâr etmekle ben dahi ücret-i mezkûreye mağrûren mahmiye-i mezbûreden kasaba-i merkūme iskelesine varıp müvekkil-i mezbûrun şa‘îrinden sefîne-i mezbûreme keyl-i İstanbûlî ile üç bin sekiz yüz keyl şa‘îr tahmîl ve İstanbul’a getirip kendi hazır olmamağla ber-vech-i muharrer vekîli olduğu şahidân-ı mezbûran şehâdetleriyle şer‘an sâbit olan mezbûr Abdullah Çelebi’ye bi’t-tamam teslîm, ol dahi bi’l-vekâle ba‘de’l-kabz ecr-i mislimi mezbûr Abdullah Çelebi’den ba‘de’d-da‘vâ ve’l-münâza‘a beynimize muslihûn tavassut edip da‘vâ-yı mezbûremden her keyline on beş akçe olmak üzere cem‘an elli yedi bin akçe üzerine vekîl-i mezbûr ile beynimizde akd-i musâlaha olundukda ben dahi sulh-ı mezbûru kabûl ve bedel-i sulh-i mezbûr elli yedi bin sağ akçeyi vekîl-i mezbûr Abdullah Çelebi yedinden bi’t-tamam ahz u kabz ve tesellüm edip husûs-ı mezbûra müte‘allika âmme-i da‘vâdan her birimiz âharın zimmetini ibrâ-yı âmm-ı kātı‘u’n-nizâ‘la ibra ve ıskāt eyledik dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn min-şehr-i Ramazani’l-mübârek li-sene seb‘a ve mie ve elf. Şuhûdü’l-hâl: Receb Efendi, nâib-i kapan, Ali Ağa b. Rasul, Yiğitbaşı Ali Bey, Hasan Ağa b. Mehmed, el-mübâşir, Abdullah Çelebi b. Ali, Lütfullah b. Ali, Ali Beşe b. Receb, Ali Beşe b. Osman, el-Hâc Mehmed b. Hüseyin, Hasırcı el-Hâc Mustafa, Hasan Çavuş b. Mehmed, Arpacı el-Hâc Mehmed, Halil Ağa b. Mehmed, Sığırcı Abdullah Çelebi, Arpacı İbrahim Çelebi, Kethudâ Mustafa, İsmail yazıcı.