İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 291 Hüküm no: 189 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vidinli Ali b. Mehmed’in köle olmadığının anlaşıldığı Rıkk-ı şâyi‘ini mu‘terîf olan açık kaşlı gök elâ gözlü orta boylu Ali b. Mehmed meclis-i şer‘-i şerîf-i enverde kendüye rıkk olmak üzere vâzı‘u’l-yed olan esirci tâifesinden el-Hâc Abbas b. el-Hâc Şükrullah mahzarında üzerine da‘vâ ve takrîr-i kelâm edip vilâyet-i Rumeli’nde Vidin kasabasında vâki‘ Yeşil Câmi mahallesinde sâkin el-Hâc Mehmed b. Abdullah’ın firâşından hâsıl ve zevce-i menkûhası Ayşe bt. Abdullah nâm hatundan mütevellid sulbî oğlu olup bana ve ebeveynime kat‘â rıkk târî olmamış iken mezbûr el-Hâc Abbas bana rıkk olmak üzere bi-gayr-ı hakkın vaz‘-ı yed eder suâl olunup kasr-ı yedine tenbîh ve sebîlim tahliye olunmak matlûbumdur dedikde gıbbe’s-suâl mezbûr el-Hâc Abbas cevâbında ben mevsûf Ali b. gāib ani’l-meclis mahrûse-i Edirne’de Nakilhâneci Ali nâm kimesneden rıkk olmak üzere yüz kırk beş guruş semen-i medfû‘a iştirâ etmekle vaz‘-ı yed ederim ber-vech-i muharrer hür olduğu ma‘lûmum değildir deyücek mezbûr Ali’den müdde‘âsını mübeyyene beyyine taleb olundukda udûl-i Müslimînden olup fi’l-asl kasaba-i mezbûrede Hamza Hoca mahallesi sükkânından olup hâlâ mahmiye-i İstanbul’da Karaki mahallesinde sâkin İbrahim b. Mustafa ve yine kasaba-i mezbûrede Alaca Tekke ahâlîsinden es-Seyyid Mustafa Çelebi b. Ahmed ve Hasan b. Hüseyin nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında işbu mezbûr Ali zikrolunan Vidin kasabasında vâki‘ Yeşil Câmi‘-i şerîf mahallesinde sâkin el-Hâc Mehmed b. Abdullah’ın firâşından hâsıl ve zevce-i menkûhası mezbûr[e] Ayşe bt. Abdullah nâm hatundan mütevellid sulbî oğludur ve hürrü’l-asldır biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle mezbûr Ali’nin hürriyetine ba‘de’l-hükm mezbûr Ali’den kasr-ı yedine mezbûr el-Hâc Abbas’a tenbîh birle ma hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min-şehr-i Ramazani’l-mübârek li-sene seb‘a ve miete ve elf. Şuhûdü’l-hâl: el-Hâc Mustafa b. Ömer, el-Hâc Ali b. el-Hâc Mustafa, İbrahim Çelebi b. Ahmed, Mehmed Çelebi b. İdris