İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 291 Hüküm no: 190 Orijinal metin no: [64a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Reis b. Mehmed’in kendi gemisiyle İsmail kasabasından Hasan Ağa b. Mustafa adına İstanbul’a getirdiği zahirenin kira bedelini aldığı Sefîne reislerinden Kuruçeşmeli Mahmud Reis b. Mehmed nâm kimesne meclis-i şer‘-i şerîf-i enverde hâlâ kasaba-i İsmail mütevellîsi olan umdetü’l-a‘yân el-Hâc Hasan Ağa b. Mustafa tarafından husûs-ı ati’z-zikre vekîl olduğu mahmiye-i İstanbul’da Pirinçci Sinan mahallesinde sâkin Mehmed Ağa b. Şaban ve Ali Ağa b. İbrahim şehâdetleriyle şer‘an sâbit olan Abdullah Çelebi b. Abdullah nâm kimesne mahzarında ikrâr-ı tâm ve takrîr-i kelâm edip târih-i kitâbdan dört ay mukaddem müvekkil-i mezbûr el-Hâc Hasan Ağa şayka ta‘bîr olunur sefînem ile mahmiye-i mezbûreden kasaba-i İsmail iskelesine varıp ondan der-anbâr olan şa‘îrinden sefîne-i mezbûreye ma‘lûmü’l-mikdâr şa‘îr tahmîl ve mahmiye-i mezbûreye götürüp nakletmek içün zikrolunan şa‘îrin her keyline on altışar akçe navl kavli ile müddet ta‘yîn etmeksizin sefîne-i mezbûreyi istîcâr etmekle ben dahi ücret-i mezkûreye mağrûren mahmiye-i mezbûreden kasaba-i merkūme iskelesine varıp müvekkil-i mezbûrun şa‘îrinden sefîne-i mezbûreme keyl-i İstanbûlî ile üç bin altı yüz keyl şa‘îr tahmîl ve İstanbul’a getirip kendi hazır olmamağla ber-vech-i muharrer vekîli olduğu şâhidân-ı mezbûrân şehâdetleriyle şer‘an sâbit olan ecr-i mislimi mezbûr Abdullah Çelebi’den ba‘de’d-da‘vâ ve’l-münâza‘a beynimize muslihûn tavassut edip da‘vâ-yı mezbûremden her keyline on beşer akçe olmak üzere cem‘an yetmiş beş bin sağ akçe üzerine vekîl-i mezbûr ile beynimizde akd-i musâlaha olundukda ben dahi sulh-i mezbûru kabûl ve bedel-i sulh olan meblağ-ı mezbûr yetmiş beş bin sağ akçeyi vekîl-i mezbûr Abdullah Çelebi yedinden bi’t-tamam ahz u kabz ve tesellüm edip husûs-ı mezbûra müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-şehr-i Ramazani’l-mübârek li-sene seb‘a ve miete ve elf. Şuhûdü’l-hâl: Receb Efendi nâib-i Resül, Ali Ağa b. Resül, Yiğitbaşı Ali Bey, Hasan Ağa b. Mehmed el-mübâşir, Abdullah Çelebi b. Ali, Lütfullah b. Ali, Ali Beşe b. Receb, Ali Beşe b. Osmân, el-Hâc Mehmed b. Hüseyin, Hasırcı el-Hâc Mustafa, Hasan Beşe b. Mehmed, Arpacı el-Hâc Mehmed, Halil Ağa b. Mehmed, Hasırcı Abdullah Çelebi, Arpacı İbrahim b. İsmail, Kethudâ Mustafa b. İsmail yazıcı