İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 292 Hüküm no: 191 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tophaneli Mehmed Reis b. Ahmed’in kendi gemisiyle İsmail kasabasından Hasan Ağa b. Mustafa adına İstanbul’a getirdiği zahirenin kira bedelini aldığı Sefîne reislerinden Tophâneli Mehmed Reis b. Ahmed nâm kimesne meclis-i şer‘-i şerîfde hâlâ kasaba-i İsmail mütevellîsi olan umdetü’l-a‘yân el-Hâc Hasan Ağa b. Mustafa tarafından husûs-ı ati’z-zikre vekîl olduğu Mahmiye-i İstanbul’da Pirinçci Sinan mahallesinde sâkin Mehmed Ağa b. Şaban ve Ali Ağa b. İbrahim şehâdetleriyle şer‘an sâbit olan Abdullah Çelebi b. Abdullah nâm kimesne mahzarında ikrâr ve ta‘bîr-i kelâm edip târih-i kitâbdan dört ay mukaddem müvekkil-i mezbûr el-Hâc Hasan Ağa şayka ta‘bîr olunur sefînem ile mahmiye-i mezbûreden ma‘lûmü’l-mikdâr şa‘îr tahmîl ve mahmiye-i mezbûreye getirip nakletmek içün zikrolunan şa‘îrin her keyline on altışar akçe navl kavli ile müddet ta‘yîn etmeksizin sefîne-i mezbûreyi istîcâr etmekle ben dahi ücret-i mezkûreye mağrûren mahmiye-i mezbûreden kasaba-i merkūme iskelesine varıp müvekkil-i mezbûrun şa‘îrinden sefîne-i mezbûreme keyl-i İstanbûlî ile üç bin altı yüz keyl şa‘îr tahmîl ve İstanbul’a getirip kendi hazır olmamağla ber-vech-i muharrer vekîli olduğu şahidân-ı mezbûrân şehâdetleriyle şer‘an sâbit olan mezbûr Abdullah Çelebi’ye bi’t-tamam teslîm ol dahi bi’l-vekâle ba‘de’l-kabz ecr-i mislimi mezbûr Abdullah Çelebi’ye ba‘de’d-da‘vâ ve’l-münâza‘a beynimize muslihûn tavassut edip da‘vâ-yı mezbûremden her keyli on beş akçe olmak üzere cem‘an elli dört bin sağ akçe üzerine vekîl-i mezbûr ile beynimizde akd-i müsâlaha olundukda ben dahi sulh-ı mezbûru kabûl bedel-i sulh-i mezbûr elli dört bin sağ akçeyi vekîl-i mezbûr Abdullah Çelebi yedinden bi’t-tamam ahz u kabz ve tesellüm edip husûs-ı mezbûra müte‘allik âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-şehr-i Ramazani’l-mübârek li-sene seb‘a ve mie ve elf. Şuhûdü’l-hâl: Receb Efendi, nâib-i Kapan, Ali Ağa b. Rasul, Yiğitbaşı Ali Bey, Hasan Ağa el-mübâşir, Abdullah Çelebi b. Ali, Lütfullah b. Ali, Ali Beşe b. Receb, Ali Beşe b. Osmân, el-Hâc Mehmed b. Hüseyin, Hasırcı el-Hâc Mustafa, Hasan b. Mehmed, Mehmed Reis b. Hasan, es-Seyyid Mustafa Reis b. Süleyman, Ali Reis b. Mehmed, el-Hâc Mehmed b. Musa, Hasan Reis b. Receb, Ahmed Reis b. Abdülkerim, es-Seyyid Mehmed Reis b. Ali.