İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 297 Hüküm no: 194 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Mustafa’nın kölesi Hüseyin Beşe b. Abdullah’ı bıçakla yaralayıp ölümüne sebep olan Ahmed Beşe’yi affettiği Vilâyet-i Anadolu’da Kasaba ahâlîsinden olup mahmiye-i İstanbul’da müsâferet üzere sâkin sefîne reislerinden el-Hâc İbrahim b. Mustafa meclis-i şer‘-i şerîf-i enverde Dergâh-ı âlî yeniçerilerinden on dördüncü hasekileri yoldaşlarından Kara Ahmed Beşe b. Kara Hasan mahzarında ikrâr-ı tâm ve takrîr-i kelâm edip târih-i kitâbdan yedi ay mukaddem işbu yedimde olan hüccet-i şer‘iyye nâtık olduğu üzere Tarabya nâm karye limanında merbût sefînemde mellâh olup Dergâh-ı âlî yeniçerilerinden yirmi yedinci ağa bölüğü neferâtından abd-i mu‘takım olan Hüseyin Beşe b. Abdullah’ı merkūm Ahmed Beşe karye-i mezbûrede vâki‘ tarîk-i âm üzerinde vakt-i mağribde kara saplı bıçak ile hatâ’en sol memesi[n] urub ol cerhden müte’essiren fevt olmağla bundan akdem mezbûr Ahmed Beşe’yi ahz ve mûcib-i şer‘îsi[n] taleb ve da‘vâ etdiğimde ol dahi ber-vech-i muharrer mezbûr Hüseyin Beşe’nin fevt olduğunu ikrâr ve i‘tirâf etmekle habsolunmuşidi el-hâletü hâzihî mezbûr Hüseyin Beşe’nin dem [ü] diyetine müte‘allika da‘vâdan ferâgat ve afv edip husûs-ı mezbûra müte‘allika âmme-i da‘vâdan mezbûr Ahmed Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min-Şevvali’l-mükerrem li-sene seb‘a ve mie ve elf. Şuhûdü’l-hâl: el-Hâc Mehmed b. Abdullah, Mahmud Çelebi b. Mehmed, Receb Bey b. Süleyman, İbrahim Bey b. Mehmed, İbrahim Çelebi b. Ahmed, Ali Bey b. Bali, Ahmed b. Ahmed, Mustafa Efendi b. Mehmed, Mehmed Efendi b. Ali, Mübâşir Ebûbekir Ağa b. Mehmed, Mehmed Çelebi b. Mehmed ve gayruhum mine’l-huzzâr