İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 297 Hüküm no: 195 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Reis b. Mustafa ile Mehmed ve Mahmud isimli gemi reislerinin gemileriyle İsmail kasabasından Hasan Ağa b. Mustafa adına getirdikleri zaharenin kiralarını aldıkları Sefîne reislerinden el-Hâc Mehmed Reis b. el-Hâc Mustafa ve Mehmed Reis b. Ahmed ve Kuruçeşmeli Mahmud Reis b. Mehmed nâm kimesneler meclis-i şer‘-i şerîf-i enverde hâlâ İsmail kasabasında mütevellî olan umdetü’l-a‘yân el-Hâc Hasan Ağa b. Mustafa tarafından husûs-ı ati’z-zikre vekîl olduğu Pirinçci Sinan mahallesinde sâkin Mehmed Ağa b. Şaban ve Ali Ağa b. İbrahim şehâdetleriyle şer‘an sâbit olan Abdullah Çelebi b. Abdullah nâm kimesne mahzarında ikrâr-ı tâm ve takrîr-i kelâm edip târih-i kitâbdan dört ay mukaddem müvekkil-i mezbûr el-Hâc Hasan Ağa şayka ta‘bîr olunur üç aded sefînemiz ile mahmiye-i mezbûrede kasaba-i İsmail İskelesi’ne varıp ondan der-anbâr olan şa‘îrinden sefâin-i mezbûreye ma‘lûmü’l-mikdâr şa‘îr tahmîl ve mahmiye-i mezbûreye getirip nakletmek içün zikrolunan şa‘îrin her keyline on altışar akçe navl kavli ile müddet ta‘yîn etmeksizin sefâyin-i mezbûreyi istîcâr etmekle biz dahi ücret-i mezkûreye mağrûren mahmiye-i mezbûreden kasaba-i merkūme iskelesine varıp müvekkil-i mezbûrun şa‘îrinden sefâyin-i mezbûremize keyl-i İstanbûlî ile on iki bin dört yüz keyl şa‘îr tahmîl ve İstanbul’a getirip kendi hazır olmamağla ber-vech-i muharrer vekîli olduğu şâhidân-ı mezbûran şehâdetleriyle şer‘an sâbit olan mezbûr Abdullah Çelebi’ye bi’t-tamam teslîm ol dahi ba‘de’l-kabz ecr-i mislimizi mezbûr Abdullah Çelebi’den ba‘de’d-da‘vâ ve’l-münâza‘a beynimize muslihûn tavassut edip da‘vâ-yı mezbûremizden her keyline on beşer akçe olmak üzere cem‘an yüz seksan altı bin sağ akçe üzerine vekîl-i mezbûr ile beynimizde akd-i müsâlaha olundukda biz dahi sulh-i mezbûru kabûl ve bedel-i sulh olan meblağ-ı mezbûr yüz seksen altı bin sağ akçeyi vekîl-i mezbûr Abdullah Çelebi yedinden bi’t-tamam ahz u kabz ve tesellüm edip husûs-ı mezbûra müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-şehr-i Ramazani’l-mübârek li-sene seb‘a ve mie ve elf. Şuhûdü’l-hâl: Receb Efendi Nâib-i kapan, Ali Ağa b. Rasul, Yiğitbaşı Ali Bey, Hasan Ağa b. Mehmed el-mübâşir, Abdullah Çelebi b. Ali, Lütfullah b. Ali, Ali Beşe b. Receb, Ali Beşe b. Osmân, el-Hâc Mehmed b. Hüseyin, Hasırcı el-Hâc Mustafa, Hasan Çavuş b. Mehmed, Arpacı el-Hâc Mehmed, Halil Ağa b. Mehmed, Hasırcı Abdullah, Arpacı İbrahim Çelebi b. İsmail, Kethudâ Mustafa, İsmail Yazıcı ve gayruhum mine’l-huzzâr