İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 305 Hüküm no: 203 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çelebi b. Ahmed’in vakıf menzil hisselerini kardeşi Emine’ye sattığı Mahmiye-i İstanbul’da Emin Bey mahallesinde sâkin iken bundan akdem vefât eden Abdurrahman Efendi b. Mehmed’in li-ebeveyn hâli ve zî-rahm cihetinden hasren vârisi olan Süleyman Çelebi b. el-Hâc Ahmed nâm tabîb mahfel-i kazâda mahalle-i merkūmede sâkine râfi‘atü hâze’l-kitâb Emine bt. el-Hâc Halil nâm hatun tarafından husûs-ı âti’l-beyâna vekîl olduğu Yusuf Efendi b. Mehmed ve Ahmed Ağa b. Mehmed nâm kimesneler şehâdetleriyle sâbit olan Ömer Ağa b. Ahmed nâm kimesne mahzarında ikrâr ve takrîr-i kelâm edip arsasının senede mezbûr Emin Bey Vakfı’na yüz yirmi akçe mukāta‘ası ve ebniyesi mülk olup mahalle-i merkūmede vâki‘ iki tarafdan Paşakırı Süleyman Ağa veresesi mülkü ve bir tarafdan ba‘zen Cemâlzâde Tabibbaşı menzili demekle ma‘rûf menzil ve ba‘zen el-Hâc Mahmud odaları ve taraf-ı râbi‘i ba‘zen el-Hâc Ömer menzili ve ba‘zen müteveffâ-yı mezbûrun hayatında tasarrufunda olan vakıf menzil ve ba‘zen tarîk-i hâsla mahdûd fevkānî bir oda ve tahtânî iki oda ve matbah ve kenîf ve bahçe ve kuyu ve havluyu müştemil ebniyesinin sekiz sehminden dört sehmi benim mülk-i mevrûsum ve dört sehmi dahi ırsen ve vasiyyeten mezbûre Emine’nin mülkü olmağla hâlâ benim mülk-i mevrûsum olan dört sehm-i şayi‘i mezbûre Emine Hatun’a tarafeynden îcâb ve kabûlü hâvî bey‘-i kat‘î ile on sekiz bin akçeye bey‘ u teslîm ol dahi ber-vech-i muharrer iştirâ ve tesellüm etdiğinden sonra semeni olan meblağ-ı merkūm on sekiz bin akçeyi mezbûre Emine Hatun’dan tamamen ahz u kabz eyledim ba‘de’l-yevm mülk-i müşterâsıdır keyfe [mâ yeşâ] ve yahtâr mutasarrife olsun ve arsasını dahi bâ-izn-i mütevellî meccânen ferâğ ve tefvîz ol dahi tefevvüz ve kabûl eyledi dedikde gıbbe’t-tasdîkı’l-mer‘î mâ vaka‘a bi’t-taleb ketb olundu. Fi’l-yevmi’r-râbi‘ aşar min-Şevvali’l-mükerrem li-sene seb‘a ve mie ve elf. Şuhûdü’l-hâl: Fahrü’l-müderrisîn Ağazâde es-Seyyid Mehmed Efendi, Mehmed Ağa b. Ali, Mustafa Efendi İmâm-ı Câmi‘-i Sultân Bâyezid, Mehmed Efendi b.( ), el-Hâc Süleyman b.( ), Ali Ağa b. el-Hâc Mehmed, Mehmed Çelebi b. ( ), Ahmed b. Ali, İbrahim Çelebi b. ( ).