İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 306 Hüküm no: 204 Orijinal metin no: [68a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhtesib İskender mahallesi sakinlerinden Abdüllatif’in sahibi olduğu evini ve bahçesini Ahmed Efendi’ye sattığı Mahmiye-i İstanbul’da Muhtesib İskender mahallesinde sâkin es-Seyyid Abdüllatif Efendi b. es-Seyyid Ahmed b. es-Seyyid Ali tarafından husûs-ı âti’l-beyânı ikrâra vekîli olduğu Mehmed b. Mustafa nâm kimesneler şehâdetleriyle şer‘an sâbit olan sulbî kebîr oğlu es-Seyyid Abdullah Efendi nâm kimesne meclis-i şer‘-i şerîf-i hatîr-i lâzımü’t-tevkīrde Sipâhi Mustafa Efendi nâm sahibü’l-hayrın nukūd-ı mevkūfesinin bi’l-fi‘il mütevellîsi olan işbu râfi‘ü’l-kitâb Ahmed Efendi b. Hüseyin nâm kimesne mahzarında bi’l-vekâle ikrâr ve takrîr-i kelâm edip babam müvekkil-i mezbûr silk-i mülk-i sahîhinde münselik olup mahalle-i mezbûrede vâki‘ bir tarafdan Mehmed Bey nâm kimesne mülkü ve iki tarafdan İsmail Efendi nâm kimesnenin menzil ve bahçesi ve bir tarafdan tarîk-i âm ile mahdûd dâhilen ve hâricen büyût-i adîde ve eşcâr-ı müsmire ve gayr-ı müsmireyi müştemil bir mikdâr bahçeyi müştemil menziline bi cümleti’t-tevâbi‘ ve’l-levâhık ve kâffetü’l-hukūk ve’l-merâfık mütevellî-i merkūm Ahmed Efendi’ye bi-tarîkı’l-istiğlâl iki yüz esedî guruşa bey‘ u teslîm ol dahi ber-vech-i muharrer mal-ı vakf-ı mezbûr ile bi’t-tevliye iştirâ ve tesellüm ve kabz ve kabûl eylediğinden sonra semeni olan meblağ-ı mezbûr iki yüz esedî guruşu babam müvekkil-i mezbûr es-Seyyid Abdüllatif Efendi mütevellî-i merkūm Ahmed Efendi yedinden tamamen ahz u kabz eylediğinden sonra mezbûru ba‘de’t-tahliyeti’ş-şer‘î ve’t-takābüzü’l-mer‘î beher sene otuzar guruş olmak üzere târih-i kitâbdan üç sene tamamına değin doksan guruşa babam müvekkil-i mezbûra îcâr ve teslîm ol dahi vech-i muharrer üzere istîcâr ve kabûl eyledi dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer min-Şevvali’l-mükerrem li-sene seb‘a ve mie ve elf. [68b] Şuhûdü’l-hâl: Molla Mustafa b. Sâdık, Molla Hasan b. Ahmed, Molla Musa b. Hüseyin, İbrahim Çelebi b. Ahmed, diğer İbrahim Çelebi b. Mehmed, Ali b. Şaban.