İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 306 Hüküm no: 205 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâbık Filibe kadısı Abdurrahman Efendi b. Mehmed’in evini mütevellî Şeyh Ahmed Efendi b. Hüseyin’e sattığı. Mahmiye-i İstanbul’da Hoca Rüstem mahallesinde sâkin sâbıkā Filibe kadısı olan umdetü’l-mevâliyi’l-izâm kıdvetü’l-e‘âliyyü’l-fihâm Abdurrahman Efendi b. Mehmed meclis-i şer‘-i şerîf-i enverde mahmiye-i mezbûrede Molla Fenârî mahallesinde vâki‘ cami‘-i şerîfin nukūd-ı mevkūfesine hâlâ mütevellî olan eş-Şeyh Ahmed Efendi b. Hüseyin mahzarında ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan merhûm Hüseyin Efendi veresesi mülkleri ve bir tarafdan ba‘zen Hasan Çelebi Vakfı ve ba‘zen merhûm Hüseyin Paşa mülküne ve bir tarafdan ba‘zen Dâye Hatun menzili ve ba‘zen Hoca Rüstem Vakfı ve bir tarafdan tarîk-i âm ile mahdûd büyût-ı adîdeyi müştemil mülk menzilimi mütevellî-i mezbûra bi tarîkı’l-istiğlâl beş yüz guruşa bey‘ ve teslîm ol dahi yedinde olan mal-ı vakf-ı mezbûr ile ber-vech-i muharrer iştirâ ve tesellüm ve kabûl ve semeni olan meblağ-ı mezbûr beş yüz guruşu yedinden tamamen ahz u kabz etdiğimden sonra mütevellî-i mezbûr menzil-i mahdûd-ı mezbûru ba‘de’t-tahliyeti’ş-şer‘iyye ve’t-takābüzü’l-mer‘î târih-i kitâbdan bir sene tamamına değin yetmiş beş guruşa bana îcâr ve teslîm ben dahi istîcâr ve tesellüm ve kabûl eyledim dedikde gıbbe’t-tasdîkı’l-mer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis aşar min-Şevvali’l-mükerrem li-sene seb‘a ve mie ve elf. Şuhûdü’l-hâl: Umdetü’l-vâ‘izîn İsa Efendi, Mehmed Efendi b. Hasan, el-Hâc İbrahim Efendi b. Ahmed, Mustafa Çelebi b. İsmail, Mehmed Çelebi b. el-mezbûr, İbrahim Çelebi b. Ahmed, Hâfız Mehmed Efendi b. Sefer.