İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 307 Hüküm no: 206 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstinye ahalisinden Hıristo v. Hırsafi’nin Ahmed b. Hasan ve Süleyman b. Ali’ye olan borçlarına karşılık menzil ve bağını rehin vermesi Mahrûse-i Galata muzâfâtından İstinye nâhiyesine tâbi‘ Yeniköy nâm karye sükkânından Hristo v. Hırsafi nâm zimmî meclis-i şer‘-i şerîf-i enverde uncu tâifesinden işbu râfi‘ü’l-vesîka el-Hâc Ahmed b. Hasan ve el-Hâc Süleyman b. Ali mahzarlarında ikrâr-ı tâm ve takrîr-i kelâm edip mezbûrân el-Hâc Ahmed ve el-Hâc Süleyman târih-i kitâbdan iki bin yüz doksan altı gün tamamına değin mü’eccel ve mev‘ûd keyli beynimizde ma‘lûm olan bahâsından otuz dört bin yüz akçe zimmetimde edâsı lâzım deynim olmağla meblağ-ı mezbûr mukābelesinde karye-i mezbûrede vâki‘ bir tarafdan âhar mülk bağım ve bir tarafdan Kostantin Reis bağı ve bir tarafdan Yorgaki nâm zimmî bağı ve bir tarafdan tarîk-i âm ile mahdûd tahmînen sekiz dönüm bağı ve yine karye-i mezbûrede vâki‘ bir tarafdan Sarı Lefter veresesi mülkleri ve bir tarafdan Kiryako nâm zimmî mülkü ve bir tarafdan Sava nâm zimmî mülkü ve taraf-ı rabi‘i deryâ ile mahdûd bir bâb fevkānî oda ve tahtında mahzen ve kenîfi ve deryâya varınca arsa-i hâliyemi müştemil mülk menzilimi ve yine karye-i mezkûrede vâki‘ bir tarafdan Nikola bağı ve bir tarafdan Kasap Kebîr’in bağı ve bir tarafdan ba‘zen Aci Todori ve ba‘zen Durak nâm zimmîler bağları ve bir tarafdan tarîk-i âm ile mahdûd bir kıt‘a mülk bağımı mezbûran el-Hâc Ahmed ve el-Hâc Süleyman’a rehin vaz‘ ve teslîm onlar dahi ber-vech-i muharrer ittihâb ve kabz ve kabûl eylediler dedikde gıbbe’t-tasdîkı’ş-şer‘î mezbûr Hristo i‘âde-i kelâm edip eğer müddet-i madrûbe tamamında meblağ-ı mezbûr otuz dört bin yüz akçeyi mezbûrân el-Hâc Ahmed ve el-Hâc Süleyman’a edâ-i fekk-i rehin müyesser olmaz ise emlâk-i mezbûreyi âhara bey‘ ve kabz-ı semene ve semeninden deyn-i mezbûru mezkûrâna edâya fazla kalır ise bana îsâle ve bunlara mütevakkıf olduğu umûrun küllîsine tarafımdan işbu hazır bi’l-meclis el-Hâc Hasan b. Davud nâm kimesneyi vekâlet-i devriye ile vekîl ve nâib-i menâb nasb u ta‘yîn eyledim dedikde ol dahi vekâlet-i mezbûreyi kabûl ve merâsimini edâya ta‘ahhüd ve iltizâm etmeğin mâ hüve’l-vâki‘ bi’t-taleb ketb olundu. Fi’l-yevmi’l-ışrîn min-Şevvali’l-mükerrem li-sene seb‘a ve mie ve elf. Şuhûdü’l-hâl: Ömer Beşe b. Ali, Mustafa Bey b. Ahî Ahmed, Mahmud Çelebi b. Davud, Ali Beşe b. Ramazan, Abdullah Beşe b. Ramazan.