İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 308 Hüküm no: 207 Orijinal metin no: [68b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali Ağa b. Mehmed’in Canbaz taifesinden Mehmed Beşe b. Abdullah’a olan borcunu kefaletinden dolayı Mehmed Beşe’nin ödemesi Mahmiye-i İstanbul’da Kapudan Sinan Paşa mahallesi sükkânından iken bundan akdem vefât eden Ali Ağa b. Mehmed b. Abdullah’ın kebîre kızı ve hasren vârisi olan fahrü’l-muhadderât bâ‘isetü’l-kitâb Fâtıma nâm hatun tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân Halil Paşa b. Abdullah ve Ali Beşe b. Yunus şehâdetleriyle şer‘an sâbit olan Halil Ağa b. Mehmed meclis-i şer‘-i şerîf-i enverde ve mahfel-i dîn-i münîf-i ezherde Mehmed Beşe b. Sefer mahzarında üzerine da‘vâ ve takrîr-i kelâm edip işbu yedimde olan temessük nâtık olduğu üzere müteveffâ-yı mezbûr Ali Ağa hayatında bin doksan altı senesi Muharremi evâilinde mezbûr Mehmed Beşe’nin dâmadı gāib ani’l-meclis canbaz tâifesinden diğer Mehmed Beşe b. Abdullah b. Abdurrahman nâm kimesne zimmetinde cihet-i karz-ı şer‘îden yüz on guruş hakkına işbu merkūm Mehmed Beşe tarafeynden emir ve kabûlü hâvî kefâlet-i sahîha-i şer‘iyye ile kefîl oldukdan sonra mezbûr Ali Ağa meblağ-ı mezbûru kable’l-ahz fevt olmağla <> hâlâ suâl olunup alıverilmesi bi’l-vekâle [69a] matlûbumdur dedikde gıbbe’s-suâl ve akībe’l-inkâr, müdde‘î-i mezbûrdan müdde‘âsına beyyine taleb olundukda udûl-i Müslimînden olup mahalle-i mezbûrede sâkin Ali Efendi b. Hüseyin ve Mehmed Beşe b. Ali nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Ali Ağa b. Mehmed hayatında bin doksan altı senesi Muharremi evâilinde mezbûr Mehmed Beşe’nin dâmadı gāib ani’l-meclis canbaz tâifesinden diğer Mehmed Beşe b. Abdullah nâm kimesne zimmetinde cihet-i mezbûrdan hakkı olan yüz on guruşa işbu mezbûr Mehmed Beşe tarafından emir ve kabûlü hâvî kefâlet-i sahîha-i şer‘iyye ile bizim huzûrumuzda kefîl olmuşidi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle meblağ-ı mezbûr yüz on guruşu vekîl-i mezbûr Halil Beşe’ye edâ ve teslîm etmek üzere merkūm Mehmed Beşe’ye ba‘de’t-tenbîh mâ vaka‘a bi’t-taleb ketb olundu. Fi’l-yevmi’l-ışrîn min-şehr-i Şevvali’l-mükerrem li-sene seb‘a ve mie ve elf. Şuhûdü’l-hâl: İbrahim Çelebi b. Ahmed, İbrahim Çelebi b. Mehmed, Mahmud b. Hasan, Osman b. Hasan ve gayruhum.