İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 309 Hüküm no: 208 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Mustafa’nın câriyesi Gülistan bt. Abdullah’ı azat ettiği Mahmiye-i İstanbul’da Gül Câmi‘i mahallesi sâkinlerinden el-Hâc Hasan b. Mustafa nâm kimesne meclis-i şer‘-i şerîf’de ikrâr-ı tâm ve takrîr-i kelâm edip ıtk-ı âti’z-zikre değin bana rıkkını mu‘terîfe olan işbu orta boylu elâ gözlü açık kaşlı Rusiyyetü’l-asl sahibetü hâze’l-kitâb Gülistan bt. Abdullah nâm câriyemi hasbeten lillâhi’l-meliki’l-hallâk ve taleben li-merzâti’r-Rabbi’r-Rezzâk tahrîr ve i‘tâk ve harâyir-i asliye zümresine idrâc ve ilhâk eyledim ba‘de’l-yevm mevsûfe-i mezbûre Gülistan sâir harâyir-i asliye gibi hür olmuşdur üzerinde velâ-i şer‘îden gayri hakkım bâkī kalmadı dedikde mâ hüve’l-vâki‘ bi’t-taleb ve’l-ibtigā ketb olundu. Fi’l-yevmi’l-hâmis aşar min-Şevvali’l-mükerrem sene 1017 Şuhûdü’l-hâl: el-Hâc Ali b. Mustafa, Hasan Çelebi b. Abdullah el-Hâc İbrahim Çelebi b. Ahmed, el-Hâc İvaz b. Abdullah, Berber Süleyman Çelebi b.( ), el-Hâc Mustafa b. Süleyman, Mahmud Çelebi b. Mehmed, Ahmed Çelebi b. İbrahim, el-Hâc Şaban el-attar, Yusuf Çelebi b. Abdullah, İbrahim Çelebi b. Ahmed, Ali beşe b. Bali, ve gayruhum mine’l-huzzâr.