İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 310 Hüküm no: 211 Orijinal metin no: [69a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Ali’nin sahibi olduğu çiftlik ve menzilini Yunus Efendi Vakfı’na satması Mahmiye-i İstanbul’da Müftü Ali Çelebi mahallesinde sâkin Mustafa Ağa b. Ali nâm kimesne meclis-i şer‘-i şerîf-i enverde mahmiye-i mezbûrede merhûm es-Seyyid Yunus Efendi Vakfı olan nukūdun bi’l-fi‘l mütevellîsi olan işbu râfi‘ü’l-kitâb Mustafa Efendi b. Mehmed mahzarında ikrâr ve takrîr-i kelâm [edip] akd-i âti’z-zikrin sudûruna değin yedimde mülküm ve hakkım olup Havâss-ı aliyye kazasına tâbi‘ Kos nâhiyesinde İkitelli nâm karyede vâki‘ bir tarafdan Seniye Hatun çayırı ve bir tarafdan Saraylı mülkü ve bir tarafdan Osman Çelebi mülkü ve bir tarafdan tarîk-i âm ile dâhiliyesi fevkānî iki bâb oda ve iki sofa ve dehliz ve bir bâb tahtânî oda ve bir matbah ve bir kilâr ve bir ambar ve iki fırın ve hâriciyesi fevkānî bir bâb oda ve altında bir oda ve bir kebîr ahur ve bir sundurma ve bir samanlık ve bir bi’r-i mâ ve zât-ı eşcâr-ı müsmire ve gayr-ı müsmire [69b] bahçeyi ve iki kıt‘a bağı müştemil çiftlik ta‘bîr olunur mülk menzilimi âmme-i hukūku ve kâffe-i merâfıkı ile ve içinde mevcûde olup beynimizde ma‘lûme âlât-ı hırâsetimi safka-i vâhide ile dört yüz kırk dört guruşa mütevellî-i mezbûr Mustafa Efendi’ye bi tarîkı’l-istiğlâl bey‘ ve teslîm ol dahi yedinde olan mal-ı vakf-ı mezbûr ile ber-vech-i muharrer iştirâ ve tesellüm ve kabûl edip semeni olan meblağ-ı mezbûr dört yüz kırk dört guruşu mütevellî-i mezbûr yedinden tamamen ahz u kabz etdiğimden sonra mütevellî-i mezbûr Mustafa Efendi menzil-i mahdûd-ı mezbûr ile zikrleri sebk eden bahçe ve bağları ve âlât-ı mezkûreyi ba‘de’t-tahliyeti’ş-şer‘iyye ve’t-takābüzü’l-mer‘î târih-i kitâbdan bir sene tamamına değin altmış altı buçuk guruşa bana îcâr ve teslîm ben dahi ber-vech-i muharrer istîcâr ve tesellüm ve kabz ve kabûl eyledim dedikde gıbbe’t-tasdîkı’ş-şer‘î mezbûr Mustafa Ağa iâde-i kelâm edip eğer müddet-i madrûbe tamında meblağ-ı mezbûr dört yüz kırk dört guruş ile ücret-i mezkûre altmış altı buçuk guruşu mütevellî-i mezbûra edâ ve teslîm müyesser olmazsa çiftlik-i mezbûru ve âlât-ı mezkûreyi ve bahçe ve bağları semen-i misilleri ile âhara bey‘ ve kabz-ı semen ve semenlerinden meblağayn-i mezbûreyni istifâya ve bunlar mütevakkıf olduğu umûrun küllîsine azl ve in‘izâlden masûn vekâlet-i devriye ile tarafımdan mezbûr Mustafa Efendi’yi vekîl ve nâib-i menâb nasb u ta‘yîn eyledim dedikde ol dahi vekâlet-i mezbûreyi ber-vech-i muharrer ba‘de’l-kabûl mahmiye-i mezbûrede Âşık Paşa mahallesinde sâkin Şaban Ağa b. Ahmed nâm kimesne [meclis-i] mezbûrda ikrâr-ı ve takrîr-i kelâm edip meblağ-ı mezbûr dört yüz kırk dört guruş ile ücret-i mezkûre altmış altı buçuk guruşa tarafeynden emir ve kabûlü hâviye kefâlet-i sahîha-i şer‘iyye ile ben kefîl oldum dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min-Şevvali’l-mükerrem li-sene seb‘a ve mie ve elf. Şuhûdü’l-hâl: Bayram Ağa b. Murad, el-Hâc İbrahim Efendi b. Ali Efendi, İbrahim Efendi müezzin-i Âşık Paşa, Mehmed Ağa b. Pîrî Bosnavî, Ahmed Ağa b. Mehmed Ağa ve gayruhum.