İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 315 Hüküm no: 217 Orijinal metin no: [70b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zefir, Kostaniye ve Luksandıra’nın vefat eden babaları Mihail v. Yorgi’den kendilerine kalan menzildeki hisselerini kardeşleri Yorga’ya sattıkları Mahmiye-i İstanbul’da Seferikoz mahallesinde sâkin iken bundan akdem hâlik olan Mihail v. Yorgi nâm zimmînin verâseti sulbî kebîr oğlu Yorgi ve sulbiyi kebîre kızı Zefîr ve Kostaniye ve Luksandıra nâm nasrâniyelere münhasıra olduğu şer‘an zâhir oldukdan sonra mezbûrat taraflarından husûs-ı âti’l-beyâna vekîl olduğu mezbûrâtın zâtlarını ma‘rifet-i şer‘iyye ile ârifân Yako v. Yani ve Yemandi v. Kostaniye nâm zimmîler şehâdetleriyle şer‘an sâbit olan Yamandi v. Toma meclis-i şer‘-i şerîf-i enverde mezbûr Yorgi mahzarında bi’l-vekâle ikrâr-ı tâm ve takrîr-i kelâm edip helik-i mezbûrun ile’l-helâk yedinde mülk ve hakkı olup ba‘de’l-helâk verese-i mezbûrûna isâbet ve intikāl eden mahrûse-i Galata muzâfâtından kasaba-i Kasımpaşa’ya tâbi‘ Tatavla nâm karyede vâki‘ bir tarafdan Dimitri zimmî mülkü ve bir tarafdan makābir-i Müslimîn ve bir tarafdan tarîk-i âm ile mahdûd üç bâb fevkānî oda ve mahzen ve su kuyusu ve bahçe ve kenîfi müştemil menzilde olan hisse-i şâyi‘alarını cemî‘-i tevâbi‘leriyle bi-safkatin vâhidetin tarafeynden îcâb ve kabûlü [hâvî] bey‘-i kat‘î ile mezbûr Yorgi’ye mezbûrât Zefir ve Kostantin ve Luksandıra [71a] iki yüz guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabûl etdiğinden sonra semeni olan iki yüz guruşu mezbûr Yorgi yedinden bi’t-tamam ahz u kabz eylediler ba‘de’l-yevm menzil-i mezbûrda olan hisse-i şâyi‘alarında alâkaları kalmayıp mezbûr Yorgi’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis aşar min-Şevvali’l-mükerrem sene [1]107 Şuhûdü’l-hâl: Ömer Efendi b. İsmail, Hakkı Efendi b. Ali, İbrahim Çelebi b. Ahmed, İbrahim Halil b. Mehmed.