İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 316 Hüküm no: 218 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zefir, Kostaniye ve Luksandıra isimli zimmîlerin vefat eden babaları Mihail v. Yorgi’den kendilerine kalan ve Cibâli kapısı haricinde bulunan menzildeki hisselerini kardeşleri Yorga’ya sattıkları Mahmiye-i İstanbul’da Seferikoz mahallesinde sâkin iken bundan akdem hâlik olan Mihail v. Yorgi nâm zimmînin verâseti sulbî kebîr oğlu Yorgi ve sulbiyi kebîre kızları Zafir ve Kostaniye ve Luksandıra nâm nasrâniyelere münhasıra olduğu şer‘[an] zâhir ve mütebeyyin oldukdan sonra mezbûrât Zafir ve Kostantıniye ve Luksandıra taraflarından husûs-ı âti’l-beyâna vekîl olduğu mezbûrâtın zâtlarını ma‘rifet-i şer‘iyye ile ârifân Yako v. Yani ve Yemandi v. Kostantin nâm zimmîler şehâdetleriyle şer‘an sâbit olan Yemandi v. Toma meclis-i şer‘-i şerîf-i enverde mezbûr Yorgi mahzarında bi’l-vekâle ikrâr-ı tâm ve takrîr-i kelâm edip hâlik-i mezbûrun ile’l-helâk yedinde mülk ve hakkı olup ba‘de’l-helâk verese-i mezbûrûna isâbet ve intikāl eden mahmiye-i mezbûrda Cibali kapısı hâricinde Seferikoz mahallesinde vâki‘ bir tarafdan mezbûrâtın âhar mülkleri ve bir tarafdan Ali Bey mülkü ve bir tarafı bahr ve bir tarafı tarîk-i âm ile mahdûd arsanın Ayasofya Vakfı’na senede iki yüz akçe mukāta‘ası olan üç bâb tahtânî oda ve iki bâb fevkānî oda ve bir matbah ve sofa ve deryâ tarafında tahtânî iki oda ve matbah ve fevkānî iki oda ve matbah ve sofayı müştemil mülk menzilinde olan hisse-i şâyi‘alarını mezbûrât Zafir ve Kostantıniye ve Luksandıra tarafından îcâb ve kabûlü hâvî bey‘-i kat‘î ile ve cemî‘ tevâbi‘leriyle bi-safkatin vâhidetin iki yüz elli guruşa mezbûr Yorgi’ye bey‘ ü temlîk ve teslîm ol dahi ber-vech-i muharrer iştirâ ve temellük ve kabûl ve semeni olan iki yüz elli guruşu yedinden bi’t-tamam kabz edip menzil-i mezbûrda olan hisse-i şâyi‘alarında kat‘â alâkaları kalmayıp mezbûr Yorgi’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâdis aşar min-Şevvali’l-mükerrem sene [1]107 Şuhûdü’l-hâl: Mehmed Efendi b. İsmail, Hasan Efendi b. Ali, İbrahim Çelebi b. Ahmed, İbrahim Çelebi b. Mehmed.