İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 317 Hüküm no: 219 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa ve İbrahim Ağa b. Ahmed’in tasarruflarında bulunan çiftlik ve tarlalarını Mustafa Ağa b. Ahmed’e sattıkları Mahmiye-i İstanbul’da Soğanağa mahallesinde sâkin el-Hâc Mehmed Ağa ve el-Hâc İbrahim Ağa b. el-Hâc Ahmed meclis-i şer‘-i şerîf-i enverde umdetü’l-eşbâh ve’l-ekfâ Mustafa Ağa b. Ahmed Efendi mahzarında bi’t-tav‘i’s-sâf her biri ikrâr-ı tâm ve takrîr-i kelâm edip Havâss-ı aliyye muzâfâtından Büyükçekmece kasabasında vâki‘ bir tarafdan ağıl ve üç tarafdan tarîk-i âm ile mahdûd dâhiliyesinde iki bâb fevkānî oda ve sofa ve dehliz ve kenîf ve tahtânî iki bâb oda ve bir havuz ve matbah ve fırın ve iki ahur ve havlu ve hâriciyesinde iki bâb tahtânî oda ve sofa ve ahur ve havuz ve bir kebîr mermer tekne ve bi’r-i mâ ve samanlık ve ambar ve kenîf ve bahçe ve havluyu müştemil ale’l-iştirâki’s-seviy çiftlik ta‘bîr olunur mülk menzil ve dalyan-ı mâhî ve menzil-i mezkûr içinde mevcûd iki su sığırı mandası ve iki kara sığır öküzü ve bir çift kara sığır ineği ve bir çift def‘a kara sığır öküzü ve def‘a üç re’s kara sığır ineği ve iki buzağı ve iki dana ve üç re’s tosun ve bir bakır tancere ve bir bakraç ve iki sahan ve bir minder ve bir yastık ve yine lede’l-ahâlî ve’l-cîrân ma‘lûmü’l-hudûd kürûmu mülk bağımızı ve elli beş keyl buğday ve kırk dokuz keyl alef ve yirmi dört keyl arpa ve üç buçuk keyl burçak ve bir keyl keten tohumu ve üç araba ve bir tohum arabası ve üç saban demiri ve bir kebîr saban demiri ve bir yuları keser ve bir el keseri ve üç burgu ve üç balta ve üç çapa ve iki bel ve mükemmel iki saban ve üç sagīr mükemmel saban demiri ve dört dingil ve beş kaz ve elli tavuk ve otuz güvercin ve üç döğen ve üç urgan ve bir yatak ve sâir âlat-ı lâzımemizi bi-safkatin vâhidetin mezbûr Mustafa Ağa tarafeynden îcâb ve kabûlü hâvî bey‘-i kat‘î ile altmış bin akçeye bey‘ ve temlîk ve yine zikrolunan çiftlik ile zirâ‘at olunup merhûm Sultân Bâyezid Han aleyhi’r-rahmeti ve’l-gufrân evkāfı arazîsinden olup mahalle-i mezbûre kurbünde vâki‘ lede’l-ahâlî ve’l-cîrân ma‘lûmü’l-hudûd dört yüz elli keyl tohum isti‘âb eder taht-ı tasarrufumuzda olan tarlalarımızı dahi bâ-izn-i sahib-i arz kırk bin akçe bedel mukābelesinde ferâğ ve tefvîz ol dahi ber-vech-i muharrer iştirâ ve temellük ve tesellüm ve tefevvüz ve kabûl ve her birini mahallerinde kabzına taslît etdiğimizden sonra semen-i mezkûr altmış bin akçe ile bedel-i ferâğ olan kırk bin akçe ki [71b] cem‘an yüz bin sağ akçeyi mezbûr Mustafa Ağa yedinden bi’t-tamam ahz u kabz ve istifâ eyledik ba‘de’l-yevm zikrolunan çiftlik ta‘bîr olunan menzil ve içinde mevcûd olan eşyâ-i muharrere-i mezkûre ve arâzide bizim kat‘â alâkamız yokdur mezbûrun mülk-i müşterâsı ve hüsn-i müfevvezi olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî gurre-i şehr-i Ramazani’l-mübârek li-sene seb‘a ve mie ve elf. Şuhûdü’l-hâl: Abdülmuti Çelebi, İbrahim Efendi b. Hüseyin, Ahmed Çelebi, tavukçu, Ebûbekir Ağa kethudâ-yı sipâh, Mustafa Çavuş b. Abdullah, İbrahim Çelebi b. Ahmed, Ali Beşe hancı, el-Hâc Abdurrahman Çelebi b. Şükür, Abdurrahman Efendi b. Mehmed Efendi, İbrahim Çelebi b. Ahmed, Ali Çelebi b. Şaban.