İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 318 Hüküm no: 220 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Şaban’ın Sifyon bt. Aslan’a olan borcunu ödemesi Mahmiye-i İstanbul’da Balat kapısı dâhilinde sâkine işbu râfi‘atü’s-sifr Sifyon bt. Aslan nâm Yahûdiye meclis-i şer‘-i şerîf-i enverde Fâtıma bt. Şaban nâm hatun mahzarında üzerine da‘vâ ve takrîr-i kelâm edip mezbûre Fâtıma zimmetinde bundan akdem yedimde iştirâ ve kabz eylediği vezni beynimizde ma‘lûm bir incili kuşak bahâsından on sekiz guruş ve alaca bahâsından iki guruş ve dikme yüz yastığı bahâsından iki buçuk guruş ve gülâbdânlı çatkı bahâsından bir buçuk guruş ve bir sülüs guruş ki cem‘an yirmi dört guruş ve bir sülüs guruş [ala]cağım hakkım olup meblağ-ı mezbûru hâlâ taleb eylediğimde bana edâdan imtinâ‘ eder suâl olunup alıverilmesi murâdımdır dedikde gıbbe’s-suâl mezbûre Fâtıma cevâbında fi’l-hakīka kazıyye vech-i muharrer üzere olup cihat-ı mezbûreden müdde‘iye-i mezbûreye meblağ-ı mezkûr yirmi beş guruş bir sülüs guruş zimmetimde lâzımü’l-edâ ve vâcibü’l-kazâ deynim vardır deyü tâyi‘an ikrâr ve i‘tirâf etmeğin alâ mûcib-i i‘tirâfihî meblağ-ı mezbûru müdde‘iye-i mezbûreye edâ ve teslîme mezbûre Fatma’ya tenbîh birle mâ vaka‘a bi’t-taleb ketb olundu. Fî evâhir-i şehr-i Şa‘bâni’l-mu‘azzam sene 1107 Şuhûdü’l-hâl: İbrahim Çelebi b. Ahmed el-mübâşir, diğer İbrahim Çelebi b. Resmî, Mehmed Çelebi b. Ahmed, Ali Çelebi b. Abdullah, İbrahim Efendi kâtib.