İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 318 Hüküm no: 221 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alacak davasından dolayı aralarında anlaşmazlık olan Ayşe bt. Abdullah ile Fâtıma bt. Abdurrahman’ın sulh oldukları Mahmiye-i İstanbul’da Avcı Bey mahallesinde sâkine Ayşe bt. Abdullah nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde Fâtıma bt. Abdurrahman nâm hatun mahzarında ikrâr ve takrîr-i kelâm edip eşyâ-i memlûkümden mecmû‘u elli [guruş] kıymetli bir en‘âm-ı şerîf ve bir ocak yaşmağı ve bir don ve bir gömlek ve bir anteri ve bir kaftan ve bir serpûş ve iki çatkı bi-gayr-ı hakkın mezbûre Fâtıma ahz u gasb etmekle bundan akdem mevcûd ise aynılarını değil ise kıymet-i şer‘iyyelerini taleb ve da‘vâ etdiğimde ol dahi inkâr etmekle beynimizde nizâ‘-ı küllî vâki‘ olmuşidi el-hâletü hâzihî da‘vâ-yı mezkûremden ferâğat edip husûs-ı mezkûra müte‘allika âmme-i da‘vâdan mezbûre Fatma’nın zimmetini ibrâ-i âmm-ı râfi‘ü’l-hısâm ile ibrâ ve ıskāt edip ol dahi târih-i kitâba gelince husûs-ı mezkûra ve gayra müte‘allika da‘vâdan benim zimmetimi ibrâ-i âmm ile ibrâ eyledikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-ışrîn min-şehr-i Şevvali’l-mükerrem li-sene seb‘a ve mie ve elf. Şuhûdü’l-hâl: Ahmed Efendi b. Hüseyin, Ahmed Çelebi b. Mehmed, el-Hâc Hasan Çelebi b. Mehmed, Abdullah b. Kenan, İmâm Mustafa Efendi b. Hasan.