İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 322 Hüküm no: 227 Orijinal metin no: [72b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahak v. Sergen’in İstirati v. Yani’ye olan borcunu ödemesi Mahmiye-i İstanbul’da tüccâr tâifesinden İstirati v. Yani nâm kimesne meclis-i şer‘-i şerîf-i enverde Sahak v. Sergen nâm kimesne muvâcehesinde üzerine da‘vâ ve takrîr-i kelâm edip bundan akdem merkūm Sahak yedimden iştirâ ve kabz eylediği ma‘lûmü’l-mikdâr bogası ve astar bahâsından on guruş ve yedimden istidâne ve kabz ve mesârifine sarfla istihlâk eylediği beş guruş cem‘an on beş guruş zimmetinde hakkım olup edâda ta‘allül etmeğin hâlâ merkūm Sahak’a suâl olunup meblağ-ı mecmû‘-ı mezbûru bana edâ ve teslîme tenbîh olunmak matlûbumdur dedikde gıbbe’s-suâl merkūm Sahak cevâbında kazıyye minvâl-i muharrer üzere olup ciheteyn-i mezbûreteynden zimmetinde müde‘î-i mezbûra min-haysü’l-mecmû‘ on beş guruş deyni olduğunu ikrâr ve i‘tirâf etmeğin mûcebince meblağ-ı mecmû‘-ı mezbûr on beş guruşu müdde‘î-i mezbûr İstirati’ye edâ ve teslîme merkūm Sahak zimmîye tenbîh olunup mâ vaka‘a bi’t-taleb ketb olundu. Fi’l-yevmi’l-hâmis min-Şevvali’l-mükerrem li-sene seb‘a ve mie ve elf. Şuhûdü’l-hâl: İbrahim Çelebi b. Ahmed, Ali Beşe b. Bali, İbrahim Çelebi b. Mehmed, Mustafa Çelebi el-hatîb ve gayruhum mine’l-huzzâr.