İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 322 Hüküm no: 228 Orijinal metin no: [72b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çavuş’un, Derviş Ağa b. Receb b. Abdullah’dan miras yoluyla kendisine intikal eden ev ile bahçesini Mustafa Ağa’ya sattığı Husûs-ı âti’z-zikrin mahâllinde ketb ve tahrîri iltimâs olunmağın savb-ı şer‘den irsâl olunan fahrü’l-müderrisîn İbrahim Efendi b. Mehmed el-Hamîdî mahmiye-i İstanbul’da Çivizâde mahallesi kurbünde Simkeş mahallesinde vâki‘ umdetü’l-emâcid ve’l-ekârim câmi‘u’l-mehâmid ve’l-mekârim Mehmed Paşa b. Abdurrahman’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i Nebevî olundukda mahmiye-i mezbûrede Yenibağçe kurbünde Arpa Emîni mahallesinde sâkin iken bundan akdem vefât eden Derviş Ağa b. Receb b. Abdullah’ın verâseti yedinde olan mazmûn-ı müsbite hüccet-i şer‘iyye mûcebince hasren vârisi olduğu lede’ş-şer‘i’l-enver mütehakkık olan li-ebeveyn er karındaşı fahrü’l-eşbâh İbrahim Çavuş [73a] meclis-i ma‘kūd-ı mezbûrda sâbıkā dârü’s-sa‘âde ağası olan iftihârü’l-emâcid ve’l-ekârim müstecma‘u’l-mehâmid ve’l-mekârim el-Hâc Mustafa Ağa b. Ahmed mahzarında ikrâr-ı tâm ve takrîr-i kelâm edip mûrisim müteveffâ-yı mezbûr Derviş Ağa’nın ile’l-vefât silk-i mülkünde münselik olup ba‘de vefâtihî bi-hasebi’l-irsi’ş-şer‘î bana isâbet ve intikāl eden zikrolunan Arpa Emîni mahallesinde vâki‘ bir tarafdan Siyavuş Paşa Vakfı olan müte’ehhilîn odaları ve bir tarafdan Ahmed Bey b. Sâdık mülkü ve iki tarafdan tarîk-i âm ile mahdûd hâriciyesinin tabaka-i ulyâsında nîm sedli kebîr oda ve bir kahve odası ve bir sofa ve üç bâb oda ve vüstâsında üç oda ve tahtânî bir oda ve matbah ve bir samanhâne ve ahır ve kenîf ve bi’r-i mâ ve dâhiliyesinde üç bâb fevkānî oda ve iki sofa ve dehliz ve bir tahta bend ve tahtânî iki bâb oda ve kilâr ve matbah ve mahtab ve bir kurnalı iki halvetli kulleteyn ve camekânlı bir hamam ve zât-ı eşcâr iki kıt‘a bahçe ve kanavât-ı müsennât ile muharrer üç masûra mâ-i cârî ve bi’r-i mâ ve havlu ve bahçe ve kenîfi müştemil mülk menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî bey‘-i kat‘î ile ba‘de’l-fek mûmâ-ileyh el-Hâc Mustafa Ağa’ya iki bin sekiz yüz yetmiş beş guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabul etdiğinden sonra semeni olan meblağ-ı mezbûr iki bin sekiz yüz yetmiş beş guruşu işbu meclis-i ma‘kūdda yedinden bi’t-tamam ahz u kabz eyledim ba‘de’l-yevm menzil-i mahdûd-ı mezbûrda kat‘an alâkam kalmayup mûmâ-ileyhin mülk-i müşterâsı olmuşdur keyfe mâ yeşâ mutasarrıf olsun dedikde gıbbe’t-tasdîkı’ş-şer‘î mevlânâ-yı mezbûr mahâllinde ketb [ve] tahrîr ve ba‘dehû ma‘an irsâl olunan İbrahim b. Abdullah ve Mahmud b. Mahmud ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Şevvali’l-mükerrem li-sene seb‘a ve mie ve elf Şuhûdü’l-hâl: Ser-mimârân-ı hâssa fahrü’l-eşbâh el-Hâc Hasan Ağa, es-Seyyid Hüseyin Çelebi b. es-Seyyid Mehmed, el-Hâc Ahmed Ağa b. el-Hâc Mehmed, Ali Paşa-yı atîk mütevellîsi el-Hâc İbrahim Ağa b. Mehmed, el-Hâc İbrahim Ağa b. Mehmed Ser-bölük-i râh-ı âb, Mehmed Çelebi b. Kâmil, Mahalle-i mezbûr imâmı Ahmed Efendi, Ahmed Çelebi b. Sâdık, el-Hâc Mustafa Çelebi b. Ahmed, Ali Çelebi b. el-Hâc Mehmed, Ahmed Bey b. Salih, Receb Çelebi b. Mustafa, Mehmed Efendi b. Receb el-imâm, Abdullah Çelebi b. Mehmed, Yahya Bey b. Mehmed, Süleyman Ağa b. Abdullah, el-Hâc İbrahim Çelebi b. Abdullah, Halil Çelebi b. Hasan, Hasan Çelebi b. Abdullah, Ali Çelebi b. Mehmed, Ali b. Abdullah ve gayruhum.