İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 324 Hüküm no: 229 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Ahmed’in kocası Mustafa Çelebi b. Mehmed’den muhâlaa yoluyla boşandığı Mahmiye-i İstanbul’da Hoca Hayreddin mahallesinde sâkine olup zâtı ma‘rifet-i şer‘iyye ile ârifân İmâm Mehmed Efendi b. Hüseyin ve es-Seyyid Sâdık Efendi b. Eş-Şeyh Mehmed ta‘rîfleriyle mu‘arrefe olan Fâtıma bt. el-Hâc Ahmed nâm hatun meclis-i şer‘-i şerîf-i enverde zevc-i dâhili işbu râfi‘ü’l-kitâb Mustafa Çelebi b. Mehmed nâm kimesne mahzarında ikrâr ve takrîr-i kelâm edip mezbûr Mustafa ile beynimizde hüsn-i zindegânemiz olmamağla zimmetinde mütekarrer ve ma‘kūdün aleyh olan üç bin akçe mehr-i mü’eccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr Mustafa Çelebi ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eylediğinden sonra hukūk-ı zevciyete ve gayre müte‘allika âmme-i da‘vâdan her birimiz âharın zimmetini ibrâ-yı âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî 27 Şevval sene [1]107 Şuhûdü’l-hâl: İmâm Mehmed Efendi b. Hüseyin Efendi, es-Seyyid Sâdık Efendi b. eş-Şeyh Mehmed, el-Hâc Ahmed b. Abdullah.