İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 324 Hüküm no: 230 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed’in Nimetullah Hatun Vakfı kaymakamı Mehmed Çelebi b. İsa Efendi’ye ödemesi gereken meblağı vekili Yusuf Çelebi b. Ali’nin ödediği Mahmiye-i İstanbul’da Nişancı Cafer Çelebi mahallesi sâkinlerinden Yusuf Çelebi b. Ali nâm kimesne meclis-i şer‘-i şerîf-i enverde merhûme Nimetullah Hatun Vakfı’na kāimmakām olan Ahmed Çelebi b. Mehmed hazır olduğu hâlde işbu râfi‘ü’l-kitâb Mehmed Çelebi b. İsa Efendi mahzarında ikrâr-ı tâm ve takrîr-i kelâm edip fi’l-asl mahalle-i mezbûre sâkinelerinden olup hâlâ Cezîre-i Kıbrıs’da Girne kazâsında mütemekkine olan Fâtıma bt. Mehmed nâm hatun bin yüz dört senesi Şevvali’nin yirminci gününde yedimde mülkü olup mahalle-i mezbûrede vâki‘ bir tarafdan Yusuf Çelebi tasarrufunda olan vakıf bahçe ve bir tarafdan Hüseyin Ağazâde [73b] Mehmed Ağa tasarrufunda Medîne-i Münevvere Vakfı olan menzil ve iki tarafdan tarîk-i âm ile mahdûd mülk bahçesine mütevelliye-i mezbûre Nimetullah Hatun’a kırk beş guruşa bi-tarîkı’l-istiğlâl bey‘ ve teslîm ol dahi mal-ı vakf-ı mezbûr ile ba‘de’l-iştirâ ve’l-kabûl meblağ-ı merkūmu mezbûre Fâtıma Hatun ahz u kabz ve mütevelliye-i mezbûre bahçe-i mezbûreyi vech-i şer‘î üzere târih-i mezkûrdan bir seneye değin altı guruş ile üç rub‘ guruşa mezbûre Fatma’ya îcâr ve teslîm ol dahi istîcâr ve kabûl etmişidi el-hâletü hâzihî mezbûre Fâtıma Hatun meblağayn-i mezkûreyni edâda âcize olup ve işbu yedimde olan hüküm hücceti nâtık olduğu üzere ben dahi mezbûrenin tarafından vekâlet-i devriye ile vekîl olduğuma binâ’en bahçe-i mezbûremi bundan akdem deyn-i mezbûr içün sûk-ı sultânîde ba‘de’l-müzâyede ve’l-kuttâ‘-ı [kat‘-ı]ragabât-ı nâs kırk beş guruşda merkūm Mehmed Çelebi üzerinde kırk beş guruşda karâr edip ziyâde ile tâlib-i âhar zuhûr etmeyip ve semen-i mezbûr bahçe-i mezbûrenin hîn-i akidde semen-i misli olduğu müte‘ayyen olmağın ben dahi bi’l-vekâle bahçe-i mahdûde-i mezbûreyi bi-cümleti’t-tevâbi‘ ve’l-levâhık bey‘-i kat‘î ile meblağ-ı mezbûr kırk beş guruşa merkūm Mehmed Çelebi’ye bey‘ ve temlîk ol dahi ber-vech-i muharrer iştirâ ve temellük ve kabz ve semen-i mezbûru bana edâ ve teslîm ben dahi yedinden ba‘de’l-ahz ve’l-kabz meblağ-ı mezbûr kırk beş guruşu gāibe-i mezbûre Fâtıma Hatun’un vakf-ı mezbûra ol mikdâr deyni içün merkūm Ahmed Çelebi’ye def‘ u teslîm ol dahi ber-vech-i muharrer yedimden ahz u kabz eyledi dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 13 Şevval sene [1]107 Şuhûdü’l-hâl: Fahrü’l-müderrisîn Abdurrahim Efendi b. Mustafa, Fahrü’l-kuzât Ali Efendi b. Osmân, Nebî Efendi b. Ali, İsmail Efendi el-imâm.