İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 325 Hüküm no: 231 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın kocası Mehmed Bey b. Abdi’den muhâlaa yoluyla boşandığı Mahmiye-i İstanbul’da el-Hâc Ferhad mahallesi sâkinelerinden olup zâtı ma‘rifet-i şer‘iyye ile ârifân Mehmed Çelebi b. Mehmed ve diğer Mehmed Çelebi b. Sefer nâm kimesneler ta‘rîfleriyle Mu‘arrefe olan Ayşe bt. Abdullah nâm hatun meclis-i şer‘de zevc-i dâhili işbu râfi‘ü’l-kitâb Mehmed Bey b. Abdi nâm kimesne mahzarında ikrâr-ı tâm ve takrîr-i kelâm edip zevcim mezbûr Mehmed Bey ile hüsn-i zindegânemiz olmamağla zimmetinde mütekarrer ve ma‘kūdün aleyh olan bin beş yüz akçe mehr-i mü’eccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm kendi üzerime olmak üzere zevcim merkūm Mehmed Bey ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl etdiğinden sonra hukūk-ı zevciyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 29 Şevval sene [1]107 Şuhûdü’l-hâl: Kadri Çelebi b. İdris, Ahmed Çelebi b. Mustafa, Ahmed Çelebi b. Mehmed, İbrahim Çelebi b. Ahmed.