İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 326 Hüküm no: 232 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hızır’ın İsmail Çelebi b. Mehmed’den kiraladığı vakıf menzilin yanması üzerine aralarında çıkan ihtilafın sulh yoluyla halledildiği Mahmiye-i İstanbul’da Çıkrıkçı Kemâl mahallesi sâkinelerinden olup zâtı ma‘rifet-i şer‘iyye ile ârifân Mehmed ve Ali ibney Yusuf ta‘rîfleriyle mu‘arrefe olan Ayşe bt. Hızır nâm hatun meclis-i şer‘-i şerîf-i enverde işbu bâ’isü’l-kitâb İsmail Çelebi b. el-Hâc Mehmed mahzarında ikrâr ve takrîr-i kelâm edip mezbûr İsmail Çelebi merhûm Hayreddin Paşa nâm sahibü’l-hayrın vakfından icâreteyn-i ma‘lûmeteyn ile taht-ı tasarrufunda olup mahrûse-i Galata’da Kürkçü kapısı dâhilinde vâki‘ ma‘lûmü’l-hudûd vakıf menzil[i] târih-i kitâbdan yedi ay mukaddem altmış guruş bedel-i makbuzu mukābelesinde bâ-ma‘rifet-i mütevellî bana ferâğ ve tefvîz ben dahi vech-i muharrer üzere tefevvüz ve kabûl eylediğimden sonra menzil-i mezbûr târih-i kitâb-ı şehrînin ikinci günü mahrûse-i mezbûrede vâki‘ olan harîkde muhterik olmağın ben dahi bedel-i mezbûr altmış guruşdan istifâ etdiğim mikdâr bedeli mezbûr İsmail Çelebi’den taleb ve da‘vâ etmişidim el-hâletü hâzihî mezbûr İsmail Çelebi bedel-i mezbûrun otuz guruşunu bi-tarîkı’s-sulh bana def‘ u teslîm ben dahi ahz u kabz ve arsa-i hâliye-i mezbûreyi yine kendüye bâ-izn-i mütevellî ferâğ ve tefvîz ve bâkī kalan otuz guruş da‘vâsından mezbûr İsmail Çelebi’nin zimmetini ibrâ ve ıskāt edip mezbûr İsmail Çelebi dahi bana medfû‘u olan meblağ-ı mezbûr otuz guruşa müte‘allika da‘vâdan benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ vaka‘a bi’t-taleb [74a] ketb olundu. Fî 29 Şevval sene [1]107 Şuhûdü’l-hâl: Abdullah Çelebi b. Abdullah, Ali Çelebi b. Abdurrahman, el-Hâc Hüseyin b. Abdullah, el-Hâc Ali Çelebi, İbrahim Çelebi b. Ahmed, Mahmud b. Hasan, Mehmed b. Hasan ve gayruhum mine’l-huzzâr.