İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 326 Hüküm no: 233 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Kuyumcuzâde el-Hâc Mehmed b. Abdullah’ın verâsetinin taksimi. Husûs-ı âti’l-beyânın mahâllinde ketb ve tahrîri içün bi’l-iltimâs savb-ı şer‘-i enverden Mevlânâ Murtaza Efendi irsâl olunup ol dahi mahmiye-i İstanbul’da Çerâğī Hamza mahallesinde sâkin iken bundan akdem vefât eden Kuyumcuzâde el-Hâc Mehmed b. Abdullah nâm kimesnenin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i mübîn eyledikde müteveffâ-yı mezbûrun verâseti zevce-i metrûkesi Emine bt. Abdullah nâm hatun ile sulbiye kebîr oğlu Ahmed Ağa ve sulbiye kebîre kızı Afîfe Hatun’a münhasıra ve tashîh-i meselesi yirmi dört sehimden olup sihâm-ı mezbûreden üç sehmi zevce-i mezbûreye ve on dört sehmi mezbûr Ahmed Ağa’ya ve yedi sehmi mezbûre Afîfe Hatun’a isâbet ve intikāl eylediği şer‘an zâhir ve mütehakkık oldukdan sonra zâtı ma‘rifet-i şer‘iyye ile ârifân İmâm Mehmed Efendi b. Mehmed ve Ahmed Efendi b. el-Hâc Mehmed ta‘rîfleri ile mu‘arrefe olan mezbûre Âmine Hatun meclis-i ma‘kūd-ı merkūmda mezbûre Afîfe’nin hâlâ zevci işbu sahibü’l-kitâb el-Hâc Yusuf b. Abdullah nâm kimesne mahzarında ikrâr-ı tâm ve takrîr-i kelâm edip zevcim müteveffâ-yı mezbûr el-Hâc Mehmed’in terekesinden olup mahalle-i mezbûrede vâki‘ bir tarafdan ba‘zen Osman Çelebi ve ba‘zen es-Seyyid Ârif Mehmed Efendi mülkleri ve iki tarafdan Halil Kethudâ veresesi mülkleri ve bir tarafdan tarîk-i âm ile mahdûd dâhiliyesinde fevkānî üç bâb oda ve bir sagīr cihânnümâ ve iki sofa ve bir kenîf ve tahtânî iki bâb oda ve bir matbah ve bir mahzen ve bir sagīr hamam ve bi’r-i mâ ve bir kenîf ve zât-ı eşcâr bir mikdâr bahçeyi ve hâriciyesinde tabaka-i ulyâda bir bâb oda ve bir sofa ve vüstâda bir bâb oda ve tahtında bir ahur ve bir kenîfi müştemil olup takvîm-i sahîh ile bin iki yüz guruşa takvîm ve tahmîn olunan mülk menzilden tashîh-i mezkûr üzere sümün hisseme isâbet eden üç sehm-i şâyi‘i bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık tarafeynden îcâb ve kabûlü hâvî bey‘-i kat‘î ile merkūm el-Hâc Yusûf’a yüz elli guruşa bey‘ ve temlîk ol dahi ber-vech-i muharrer iştirâ ve temellük ve kabûl edip ve semeni olan meblağ-ı mezbûr yüz elli guruşu bana edâ ve teslîm ben dahi yedinden tamamen ahz u kabz eyledim ba‘de’l-yevm menzil-i mahdûd-ı mezkûrun ve müştemilâtının yirmi dört sehimden hissem olan üç sehm-i şâyi‘i merkūm el-Hâc Yusuf’un mülk-i müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î husûs-ı mezkûru mevlânâ-yı merkūm mahâllinde tahrîr ba‘dehû ma‘an ba‘s olunan Mustafa Çelebi b. el-Hâc İsmail ve Mehmed b. Mehmed ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî min-Zilka‘deti’ş-şerîfe sene [1]107 Şuhûdü’l-hâl: es-Seyyid Ârif Mehmed Efendi b. es-Seyyid Mustafa, İmâm Mehmed Efendi b. Mehmed, Ahmed Efendi b. el-Hâc Mehmed, el-Hâc Ahmed Ağa b. Derviş, el-Hâc İbrahim b. Mahmud, el-Hâc Yusuf b. Mustafa, Mustafa Çelebi b. el-Hâc İsmail