İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 327 Hüküm no: 234 Orijinal metin no: [74a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lütfü Mustafa Efendi b. Mehmed b. Abdullah’ın menzilini İsa Efendi Vakfı’na rehin bıraktığı Mahmiye-i İstanbul’da Harâccı Muhyiddin mahallesi sükkânından fahrü’l-eşbâh Lütfü Mustafa Efendi b. Mehmed b. Abdullah tarafından husûs-ı âti’l-beyâna vekîl olduğu mûmâ-ileyhin etbâ‘ından Ahmed Bey b. Abdullah ve Mehmed Bey b. Mustafa şehâdetleriyle şer‘an sâbit olan es-Seyyid eş-Şeyh Hasan b. es-Seyyid Ramazan meclis-i şer‘-i şerîf-i Ahmedî’de ve mahfel-i dîn-i münîf-i Muhammedî’de merhûm İsa Efendi nâm sahibü’l-hayrın nukūd-ı mevkūfesine bi’l-fi‘l mütevellî olan işbu râfi‘ü’l-vesîka Mehmed Çelebi b. Abdi mahzarında bi’l-vekâle ikrâr ve takrîr-i kelâm edip müvekkilim mezkûrun silk-i mülkünde münselik olup mahalle-i mezbûrda vâki‘ iki tarafdan tarîk-i âm ve bir tarafdan İbrahim Efendi mülkü ve bir tarafdan merhûm es-Seyyid İbrahim Çelebi vereseleri mülkü ile mahdûd dâhiliye ve hâriciyede büyût-i adîdeyi müştemil mülk menziline bundan akdem yedinde olan istiğlâl hücceti nâtık olduğu üzere beş yüz kırk guruşa bi-tarîkı’l-istiğlâl bey‘ u teslîm ol dahi mal-ı vakf-ı mezbûr ile bi’t-tevliye iştirâ ve tesellüm edip meblağ-ı mezkûru mütevellî-i mezbûrdan mukaddemâ ahz u kabz edip hâlâ zimmetinde vâcibü’l-edâ deyni olup lâkin mütevellî-i mezbûr menzil-i [74b] mezbûru hüccet-i mezbûre nâtık olduğu üzere mukaddemâ ba‘de’t-tahliye ve’t-takābuz müddet-i ma‘lûme tamamına değin beynlerinde ma‘lûm ücret-i makbûza ile îcâr edip el-ân müddet-i icâre tamam olup tecdîd-i akd-i icâreye muhtâc olmağın mütevellî-i mezbûr menzil-i merkūmu târih-i kitâb senesi Rebî‘ülûlâsı gurresinden bir sene tamamına değin müvekkilim mezbûr Lütfü Mustafa Efendi’ye seksen bir guruş ücretle icâre-i cedîde ile îcâr ol dahi istîcâr ve kabûl eyledi dedikde gıbbe’t-tasdîkı’ş-şer‘î vekîl-i mezbûr i‘âde-i kelâm edip eğer müvekkilim müşârun-ileyh Mustafa Efendi ecel-i mezbûr hulûlünde meblağayn-i mezbûreyn cem‘an altı yüz yirmi bir guruşu mütevellî-i mezbûr edâda âciz olur ise menzil-i mahdûd-ı mezbûru semen-i misli ile ahara bey‘ ve kabz-ı semene ve semeninden deyn-i mezbûru mütevellî-i mezkûra edâya ve fazla kalır ise müvekkilim mezkûra îsâle ve bunlar mütevakkıf olduğu umûrun küllîsine azl ve in‘izâlden masûne vekâlet-i devriye ile tarafından işbu Ali Çelebi b. Nebi nâm kimesneyi vekîl ve nâib-i menâb nasb u ta‘yîn edip ol dahi vekâlet-i mezbûreyi kabûl ve merâsimini edâya ta‘ahhüd ve iltizâm eyledi dedikde mâ vaka‘a bi’t-taleb ketb olundu. Fî 26 L sene [1]107 Şuhûdü’l-hâl: İmâm Ahmed Efendi b. Receb, Abdullah Çelebi b. Mehmed, Hasan Çelebi b. Abdullah, Mustafa Çelebi b. ( ), Mustafa Çelebi b. Ömer, Abdurrahman Efendi b. Ahmed el-kayyum, İbrahim Çelebi b. Ahmed.