İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 328 Hüküm no: 235 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Abdullah’ın Ali b. Abdullah ve zevcesi Sâliha’ya verdiği emanet para ve eşya konusunda çıkan ihtilafını sulh yoluyla hallettiği Mahmiye-i İstanbul’da Şehremîni kurbünde Çivizâde mahallesi sâkinlerinden Ahmed b. Abdullah nâm kimesne meclis-i şer‘-i şerîf-i enverde ve mahfel-i dîn-i münîf-i ezherde bâ‘isü hâze’l-kitâb Ali b. Abdullah nâm kimesne ile zevcesi Sâliha bt. Abdullah nâm hatun mahzarlarında ikrâr ve takrîr-i kelâm edip mezbûrân Ali ve Sâliha’ya bundan akdem nakd altmış guruş ile eşyâ-i memlûkemden bir çuka kerake ve bir çakşır ve bir sarık ve bir beyaz sâdemi bi-tarîkı’l-emâne def‘ u teslîm mezbûrân dahi ahz u kabz etmişidi deyü meblağ-ı mezbûr ile eşyâ-i mezkûremi taleb ve da‘vâ eylediğimde onlar dahi meblağ-ı mezbûr ile eşyâ-i mezkûreyi bi’t-tamam sana def‘ u teslîm eyledik demeleriyle beynimizde nizâ‘-ı küllî vukū‘ından sonra muslihûn tavassut edip da‘vâ-yı mezkûremden fâriğ olup husûs-ı mezbûra müte‘allika âmme-i da‘vâdan mezbûrânın zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 16 L sene [1]107 Şuhûdü’l-hâl: İbrahim Çelebi b. Mehmed, Mustafa Çelebi b. Şaban, Ali Çelebi b. Bali, Hüseyin Çelebi b. Mehmed, Mahmud Çelebi b. Mehmed, Osman Çelebi b. Hasan ve gayruhum mine’l-huzzâr.