İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 329 Hüküm no: 236 Orijinal metin no: [74b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Ebubekir’in menzil ve çiftliğini Hasan b. Mahmud’a sattığı Mahmiye-i İstanbul’da Pirinçci Sinan mahallesinde sâkine Fâtıma bt. Ebûbekir nâm hatun tarafından husûs-ı âti’l-beyâna vekîl olduğu zâtı ma‘rifet-i şer‘iyye ile ârifân olan Mustafa Efendi b. Mehmed Emin Efendi ve Hüseyin b. Abdullah nâm kimesneler şehâdetleriyle sâbit olan Mehmed Efendi b. Mehmed Emin Efendi nâm kimesne mahfel-i kazâda işbu râfi‘ü’l-[kitâb] el-Hâc Hasan b. Mahmud nâm kimesne tarafından husûs-ı câ’i’l-beyânı tasdîka vekîl-i müsecceli olan Hüseyin b. Mehmed mahzarında bi’l-vekâle ikrâr ve takrîr-i kelâm edip müvekkilem mezbûre Fâtıma Hatun vilâyet-i Rumeli’nde Saray kazâsına tâbi‘ İdel nâm karyede vâki‘ bir tarafdan Emine Hatun ve bir tarafdan Ahmed nâm kimesne arpalığı ve iki tarafdan tarîk-i âm ile mahdûd dâhiliyesi iki bâb oda ve sofa ve sundurmasında bir fırın ve zahrında bir tavuk kümesi ve bir fevkānî güvercinlik ve iki çatma ambar ve bir yan damı ve bi’r-i mâ ve bahçe ve hâriciyesinde bir öküz ahuru ve ona muttasıl bir misâfirhâne ve bir köhne samanlık ve harem duvarına muttasıl iki yan damı ve bi’r-i mâ ve bir mikdâr eşcârı bağ yeri ve harman yerini müştemil çiftlik ta‘bîr olunur mülk menzilini mezbûr el-Hâc Hasan’a tarafeynden îcâb ve kabûlü hâvî bey‘-i kat‘î ile yüz yirmi guruşa bey‘ ve karye-i merkūme sınırı dâhilinde vâki‘ lede’l-ahâlî ma‘lûmü’l-hudûd ve’l-kıt‘a tarlalar ve çayırları dahi ma‘rifet-i sahib-i arzla kırk guruş bedel mukābelesinde ferâğ ve tefvîz ol dahi ber-vech-i muharrer iştirâ ve kabûl ve tefevvüz etdikten sonra semen-i merkūm yüz yirmi guruş ile bedel-i mezkûr kırk guruş ki cem‘an yüz altmış guruşu vekîl-i mezbûr yedinden ahz u kabz edip çiftlik-i mezkûra ve tarlalara ve çayırlara mahâllinde kabza mezbûr el-Hâc Hasan’ı taslît eyledi ba‘de’l-yevm zikrolunan çiftlik ve tarlalar ve çayırlarda mezkûr Fatma’nın alâkası kalmayıp mezbûr el-Hâc Hasan’ındır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 2 Za sene [1]107 Şuhûdü’l-hâl: Mustafa Efendi b. Mahmud Efendi, Hüseyin Çelebi b. Abdullah, Yusuf Çelebi b. Abdullah, Mehmed Efendi b. ( ).