İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 330 Hüküm no: 237 Orijinal metin no: [75a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Payaszâde Mustafa Çelebi Vakfı’na aid olup tamamen yandığı için mütevellî Mahmud Bey b. Ahmed Paşa tarafından yeniden inşa edilen Halvetiye şeyhlerine mahsus tekkenin inşa masrafları Mahmiye-i İstanbul’da Darbhâne kurbünde Sekbânbaşı Yakub Ağa mahallesinde vâki‘ merhûm Payaszâde Mustafa Çelebi Vakfı’na bi’l-fi‘l mütevellî olan râfi‘u hâze’l-kitâb fahrü’l-emâsil ve’l-a‘yân Mahmud Bey b. el-merhûm Ahmed Paşa mahfel-i kazâda bi’t-tevliye ikrâr-ı tâm ve takrîr-i kelâm edip vakf-ı mezbûrdan olup mahalle-i merkūmede vâki‘ lede’l-ahâlî ve’l-cîrân ma‘lûmü’l-hudûd Halvetiye şeyhine mevkūfe tekye bin yetmiş senesinde vâki‘ harîkde muhterik olmağla arsası sırfa kalıp binâya vakıfda müsâ‘ade olunmamağla bu âna değin binâ olunmayıp lâkin taraf-ı saltanat-ı aliyyeden mârrü’z-zikr tekye binâ olunmak üzere tenbîh olunmağla ben dahi izn-i şer‘le tekke-i merkūmeyi müceddeden binâ etdiğim ecilden hâlâ kıbel-i şer‘den üzerine varılup masrûfum olan ba‘de’l-keşf tahmîn-i sahîh ile tahmîn ve takvîm ve hüccet olunmak bi’t-tevliye matlûbumdur dedikde savb-ı şer‘den Muhâsebe Kâtibi Mevlânâ Abdurrahman Efendi b. Mehmed irsâl olunup ol dahi hâssa mi‘mârlardan Mehmed Halîfe b. Abdullah ve Ali Halîfe b. Abdurrahman ve Salih Halîfe b. Ali ve zeyl-i kitâbda muharrerü’l-esâmî olan Müslimîn ile mârrü’z-zikr tekyenin üzerine varıp mârrü’z-zikr mi‘mâr lar mütevellî-i merkūm ve Müslimîn-i mezkûrîn muvâcehelerinden keşf ve misâha eylediklerinde tekke-i merkūme mescid-i şerîfin tûlen ve arzan bi-hesâbı terbî‘î iki yüz altı zirâ‘ sakfının zirâ‘ı yetmişer akçeden on altı bin iki yüz kırk akçe ve bi-hesâbı mezbûr yüz yetmiş sekiz zirâ‘ polat şişeli ve sülügen boyalı çam tahtası tavanın zirâ‘ı kırk akçeden yedi bin yüz akçe ve tekye-i merkūmenin tûlen on zirâ‘ ve arzen on zirâ‘ bi-hesâb-ı mezkûr yüz zirâ‘ ceviz ağacından tahta döşemelik zirâ‘ı sekiz akçeden sekiz bin akçe ve bi-hesâbı mezkûr kırk sekiz zirâ‘ mahfel döşemesinin zirâ‘ı altmışar akçeden iki bin sekiz yüz seksen akçe ve beş zirâ‘ sülügen boyalı kafesin zirâ‘ı sekiz akçeden dört yüz akçe ve bi-hesâbı mezkûr yirmi zirâ‘ sülügen boyalı tarabzanın zirâ‘ı ellişer akçeden bin akçe ve yedi buçuk zirâ‘ tahta perde zirâ‘ı otuzar akçeden iki yüz yirmi beş akçe ve rengâmîz bâdemî astarlı beş çift cam her biri altışar yüz akçeden üç bin akçe ve çerçeveli sekiz aded billûr cam her biri yüz yirmişer akçeden dokuz yüz altmış akçe ve sekiz ağaç parmaklı pencereler her biri yüz ellişer akçeden bin iki yüz akçe ve Arabî kanatlı yedi aded demir pencere her biri beşer yüz akçeden üç bin beş yüz akçe ve arzan bir kadden iki zirâ‘ yedi aded billûr cam her biri ikişer yüz yirmişer akçeden beş yüz kırk akçe etrâfı tahta kaplama bir aded nerdübân ber-vech-i tahmîn yedi yüz akçe ve mahfil altında sülügen boyalı otuz zirâ‘ tavanın zirâ‘ı otuzar akçeden dokuz yüz akçe ve mukarnes mihrâb ber-vech-i tahmîn bin iki yüz akçe ve tavan ortasında vâki‘ dört aded zincir her biri altmışar akçeden iki yüz kırk akçe ve dört kapı her biri yüz yirmişer akçeden dört yüz seksen akçe ve tûlen otuz yedi ve kadden altı bi-hesâbı mezkûr iki yüz yirmi iki zirâ‘ dolma duvarın zirâ‘ı kırkar akçeden sekiz bin sekiz yüz seksen akçe ve bi-hesâbı mezkûr dört yüz kırk dört zirâ‘ kireç sıvanın zirâ‘ sekizer akçeden üç bin beş yüz elli iki akçe ve duvar-ı mezkûrun tûlen ve kadden bi-hesâbı mezkûr yüz on zirâ‘ taş temelinin zirâ‘ı altmışar akçeden altı bin altı yüz akçe ve bir mükemmel Arabî kapı ber-vech-i tahmîn sekiz yüz akçe ve küfegî taşından on bir ayak bir nerdübân seksen akçeden sekiz yüz akçe ve künkî taşından üç buçuk zirâ‘ sahnın zirâ‘ı sekiz akçeden iki yüz seksen akçe ve iki aded İznikmid topacı direk ma‘a boya ve üstâdiye yüz altmış akçe ve bir değirmen eğrisi direk yüz akçe ve üzerinden tabana iki yüz elli akçe ve bir sâde trabzan yüz yirmi akçe ve bir teneke-i merkūmeden tûlen ve arzen bi-hesâb-ı mezkûr üç yüz otuz zirâ‘ arsa üzerine müceddeden binâ olunan yirmi bâb odaların sülügen boyalı yassı şişe çam tahtası tavanlı dolap ve uçaklara? pencere ve dehliz ve kapılar ile her bir oda üçer bin akçeden altmış bin akçe ve bir mağsel ber-vech-i tahmîn iki bin beş yüz akçe ve bi-hesâbı mezkûr iki yüz on zirâ‘ kaldırımın zirâ‘ı onar akçeden iki bin yüz akçe ve musluk üzerinde bi-hesâb-ı mezkûr on beş zirâ‘ sakf ma‘a tavan dokuz yüz akçe ve küfegî taşdan bir musluk sekiz yüz akçe ve üç aded tuc lüle her biri otuzar akçeden doksan akçe ve beş kulaç-ı cedîd kukalı kolacı? üçer yüz ellişer akçeden bin yedi yüz elli akçe ve altı kulaç bir cedîd tulumba yedi yüz akçe ve bi-hesâbı mezkûr yüz otuz zirâ‘ kireç terziyle taş duvar zirâ‘ı yetmişer akçeden dokuz bin yüz akçe ve haremde vâki‘ tûlen ve arzen bi-hesâb-ı merkūm yetmiş zirâ‘ arsa üzerinde mebnî sülügen boyalı çam tahtası tavanları fevkānî bir kebîr oda ma‘a matbah ve tahta-pûş ve dehliz ve tahtânî bir oda ve taş duvarlı bodrum ve pencere ve kapı ile zirâ‘ı dört yüz ellişer akçeden otuz bir bin beş yüz akçe bi-hesâbı merkūm yetmiş beş zirâ‘ taş duvarın zirâ‘ı altışar akçeden dört bin beş yüz akçe ve mükemmel bir sokak kapısı ma‘a kilit ber-vech-i muharrer yedi yüz akçe [75b] ve kapı arasında bi-hesâbı merkūm dokuz yüz zirâ‘ sed taş duvarın zirâ‘ı ellişer akçeden dört yüz elli akçe ve bi-hesâbı merkūm on zirâ‘ ağaç parmaklık zirâ‘ı otuzar akçeden üç yüz akçe ve tarîk-i âm tarafında vâki‘ mükemmel bir harem kapısı ber-vech-i tahmîn üç yüz akçe ki min-haysü’l-mecmû‘ işbu müceddeden binâ olunan ebniye-i meşrûha yüz seksen altı bin sekiz yüz doksan yedi akçe ile ancak olup bundan noksan ile olmaz deyü sâlifü’z-zikr mi‘mâr lar ve Müslimîn-i mezbûrîn icma‘ ve ittifâk etmeleriyle vâki‘ hâli mevlânâ-yı mezbûr mahâllinde tahrîr ba‘dehû cânib-i şer‘den ma‘an irsâl olunan Mustafa b. Hasan ve Mehmed b. İbrahim ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ve’l-ibtigā ketb ve imlâ olundu. Fi’l-yevmi’l-ışrîn min-Şa‘bâni’l-mu‘azzam li-sene seb‘a ve mie ve elf. Şuhûdü’l-hâl: Es-Şeyh Ahmed Efendi b. Abdülkadir şeyh-i zâviye, Ahmed Dede b. Mehmed sâkin-i hücre, Hacı Mehmed Dede sâkin-i hücre, Mehmed Efendi sâkin-i hücre, Müsevvid Mehmed Efendi sâkin-i hücre, Hüseyin Ağa b. Abdullah, Ali Ağa b. Abdi, Mahmud Çelebi b. Hamid Bursevî, Ahmed Çelebi b. ( ), Mustafa Çelebi b. Yusuf, Derviş Çelebi b. Mustafa, Salih Çelebi b. Hasan.