İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 332 Hüküm no: 238 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Mustafa’nın ekmekçi Mıgırdıç v. Abraham’a olan borcunu ödemesi Mahrûse-i Galata muzâfâtından kasaba-i Tophâne’de Yorgaki mahallesinde sâkin Mehmed Ağa b. Mustafa meclis-i şer‘-i şerîf-i enverde ekmekçi tâifesinden Mıgırdıc v. Abraham nâm zimmî muvâcehesinde üzerine da‘vâ ve takrîr-i kelâm edip bin doksan dokuz senesinde Azak tarafına gider oldukda mezbûr Mıgırdıc bana altı yüz guruşunu malından ikrâz ve teslîm ben dahi yedinden iktirâz ve kabz etdiğimden sonra meblağ-ı mezbûr gāib ani’l-meclis Kantaroğlu nâm kimesne benim emrimle kefâlet-i sahîha-i şer‘iyye ile kefîl olmağla meblağ-ı mezbûrun beş yüz guruşunu mezbûr Mıgırdıc benim haberim yok iken kefîl-i mezbûrdan ahz u kabz etdiğinden sonra bâkī yüz guruşu zimmetimde hakkı kalmış iken bundan akdem mezbûr Mıgırdıc ben ahz edip ben senin kefîlinden ancak kefâletine binâ’en üç yüz kırk guruş ahz u kabz eyledim deyü benden dahi iki yüz altmış guruşu ahz u kabz etmekle mezbûr Mıgırdıc’a suâl olunup ziyâde me’hûzu olan yüz altmış guruşun bana alıverilmesi matlûbumdur dedikde gıbbe’s-suâl mezbûr Mıgırdıc cevâbında ben meblağ-ı mezbûr altı yüz guruşdan kefîl-i mezbûr Kantaroğlu’ndan ancak beş yüz guruş ahz u kabz edip bâkī mezbûr Mehmed Ağa zimmetinde yüz guruş hakkım vardır taleb ederim deyü meblağ-ı mezbûr iki yüz altmış guruş kabzın[ı] bi’l-külliye inkâr edicek müdde‘î-i mezbûr Mehmed Ağa’dan müdde‘âsı olan iki yüz altmış guruşu mezbûr Mıgırdıc’a teslîmini mübeyyene beyyine taleb olundukda ityân-ı beyyine içün istimhâl etmekle kirâren ve mirâren elli gün mikdârı mehl-i şer‘î birle ba‘de’l-imhâl ityân-ı beyyineye bir vechile kādir olamayıp yemîn dahi vermemekle ikrârı mûcebince meblağ-ı bâkī-i mezbûr yüz guruşu dahi mezbûr Mıgırdıc zimmîye edâ ve teslîme mezbûr Mehmed Ağa’ya tenbîh birle mâ hüve’l-vâki‘ bi’t-taleb ketb olundu. Fi’l-yevmi’s-sâlis aşar min-şehr-i Şevvali’l-mükerrem li-sene seb‘a ve mie ve elf. Şuhûdü’l-hâl: İbrahim Çelebi b. Ahmed, Mustafa b. Ali, Receb b. Süleyman, Ahmed b. Ahmed, Ali b. Bali, İbrahim Çelebi b. Mehmed, el-Hâc Mehmed Efendi b. İbrahim ve gayruhum mine’l-huzzâr.