İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 333 Hüküm no: 239 Orijinal metin no: [75b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Sadık’ın menziline ilave etmek istediği binanın komşusu Hasan Ağa’ya zararının olmadığı Husûs-ı ati’l-beyânın mahâllinde keşf ve tahrîri içün sâdır olan fermân-ı âlîye imtisâlen savb-ı şer‘-i âlîden keşif nâibimiz fahrü’l-müderrisîni’l-kirâm Mevlânâ Abdullah Efendi b. Ali irsâl olunup ol dahi atabe-i aliyyeden bi’l-fi‘l ser-mimârân-ı hâssa olan fahrü’l-eşbâh Hüseyin Ağa b. Musa ve hâssa mi‘mâr lardan üstâd Ali Halîfe b. Mustafa ile mahmiye-i İstanbul’da Debbağ Yunus mahallesinde vâki‘ işbu bâ‘isü’l-kitâb Mehmed Efendi b. Sâdık nâm kimesnenin mülk menziline varıp zeyl-i kitâbda muharrerü’l-esâmî olan udûl-i Müslimîn ve sikāt-ı muvahhidîn mahzarlarında akd-i meclis-i şer‘-i mübîn eyledikde mezbûr Mehmed Efendi meclis-i ma‘kūd-ı mezkûrda câr-ı mülâsıkı Hasan Ağa b. el-Hâc Ali nâm kimesne mahzarında takrîr-i da‘vâ ve tasvîr-i müdde‘â edip sırf-ı mülk-i sahîhim olup işbu müşâhede ve mu‘âyene olunan tahtânî odanın üzerine kadden dört zirâ‘ bir bâb fevkānî oda müceddeden binâ ve ihdâs etmek murâd eylediğimde câr-ı mülâsıkım olan işbu mezbûr Hasan Ağa’nın mülk menziline kat‘an zararı yok iken mezbûr Hasan Ağa binâma mümâna‘at eder hâlâ keşf ve mu‘âyene olunup ber-vech-i meşrûh binâma mümâna‘at etmemek üzere mezbûr Hasan Ağa’ya tenbîh olunmak matlûbumdur dedikde mezbûr Hüseyin Ağa [76a] ve mi‘mâr -ı mezbûr ve sâir muslimûn-ı mezkûrûn ile keşf ve mu‘ayene olundukda mezbûr Mehmed Efendi kendi sırf-ı mülkü olan sâlifü’z-zikr odası üzerine ber-vech-i meşrûh kadden dört zirâ‘ bir bâb fevkānî oda müceddeden binâ ve ihdâs eyledikde câr-ı mülâsıkı mezbûr Hasan Ağa’nın mülk menziline kat‘an zararı olmadığını mûmâ-ileyh Hüseyin Ağa ve mi‘mâr -ı mezbûr ve sâir Müslimîn-i mezkûrîn mezbûr Hasan Ağa muvâcehesinde icmâ‘ ve ittifâk ve ihbâr eylediklerinden sonra mezbûr Mehmed Efendi kendi sırf-ı mülkü olan mârrü’z-zikr oda üzerine ber-vech-i meşrûh kadden dört zirâ‘ bir bâb oda binâ etmesine mümâna‘at etmemek üzere mezbûr Hasan Ağa’ya ba‘de’t-tenbîh vâki‘ hâli mevlânâ-yı mezbûr mahâllinde ketb ve tahrîr ba‘dehû ma‘an irsâl olunan Mustafa Efendi b. Ömer ve Mehmed Çelebi b. İbrahim ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ve’l-ibtigā ketb ve tahrîr olundu. Fi’l-yevmi’r-râbi‘ ve’l-ışrîn min-Şa‘bani’l-mu‘azzam li-sene seb‘a ve mie ve elf. Şuhûdü’l-hâl: Fahrü’l-müderrisîn Mehmed Efendi b. Hasan Efendi, Ahmed Efendi b. Mahmud el-imâm, Süleyman Efendi b. Osman el-müezzin, Ali Efendi b. Hasan, el-Hâc Mehmed Ağa b. Abdullah, el-Hâc Ahmed b. Mehmed, Hasan Ağa b. Mehmed el-mübâşir, Mehmed Çelebi b. Yakub, el-Hâc Mahmud Ağa b. Ahmed, Mehmed Çelebi b. İbrahim.