İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 334 Hüküm no: 240 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bekirzâde Mahmud Efendi Vakfı’na aid olup Sultan Hatun tasarrufunda bulunan ve yıkılmak üzere olan odaların ve arsasının kıymet tespiti Husûs-ı âti’z-zikrin mahâllinde keşf ve tahrîri iltimâs olunmağın sâbıkā Rumeli kazaskeri olan a‘lemü’l-ulemâ’i’l-izâm efdalü’l-fudalâi’l-fihâm hallâlü’l-müşkilâti’d-dîniye keşşâfü’l-mu‘dılâti’l-yakīniye yenbû‘u’l-fezâil ve’l-me‘âlî metbû‘i’l-efâzıl ve’l-e‘âlî alleme’l-ilmi ve’l-hüdâ menârü’l-fazl ve’t-takā fazîletlü Mirza Mustafa Efendi hazretlerinin mahmiye-i İstanbul’da Koğacı Dede mahallesinde vâki‘ ashâb-ı hayrâtdan merhûm Bekirzâde Mahmud Efendi Vakfı’ndan icâre-i mu‘accele ve beher mâh otuzar akçe mü’eccele ile taht-ı tasarruflarında olup bir tarafdan Çukurbostan ve bir tarafdan merhûm Osman Paşa hemşîresi Sultân Hatun tasarrufunda olan vakıf menzil ve bir tarafdan müşârun-ileyh hazretleri menzili ve bir tarafdan tarîk-i hâs ile mahdûd fevkānî ve tahtânî ikişer bâb odaları müştemil olan altı bâb müte’ehhilîn odalarının üzerlerine hâssa mi‘mâr lardan es-Seyyid Mustafa Halîfe b. Eyüb ve Mehmed Halîfe b. Abdullah ve zeyl-i kitâbda muharrerü’l-esâmî Müslimîn ile varıp akd-i meclis-i şer‘-i Nebevî olundukda müşârun-ileyh hazretleri meclis-i ma‘kūd-ı mezbûrda vakf-ı mezbûra mütevellî olan Osman Efendi b. Muzaffer mahzarında takrîr-i kelâm ve ta‘bîr-i merâm edip vakf-ı mezbûrdan işbu tasarrufumda olan altı bâb müte’ehhilîn odaları mürûr-ı eyyâm ile müşrif-i harâb olmağla tefahhus-ı mevcûdları ba‘de’l-keşf ve’l-mu‘âyene kıymet-i şer‘iyyeleri tahmîn ve taraf-ı vakfa deynim olmak matlûbumdur dedikde husûs-ı mezbûr vakf-ı mezbûr hakkında min-külli’l-vücûh evlâ ve enfa‘ olduğunu sikāt-ı makbûletü’l-kelimât dahi ihbâr etmeleriyle mi‘mâr ân-ı mezbûrân cümle muvâcehelerinde evvelâ zikrolunan odaların arsalarını misâha etdiklerinde tûlen ve arzan bi-hesâbı terbî‘î yalnız dört yüz sekiz zirâ‘ arsaları ve üç yüz kırk zirâ‘ köhne ebniye duvar otuz altı zirâ‘ taş duvarları olduğu lede’ş-şer‘i’l-enver müte‘ayyen oldukdan sonra mi‘mâr ân-ı mezbûrân zikrolunan enkāzı tahmîn etdiklerinde üç yüz kırk zirâ‘ köhne binânın zirâ‘ı yüz kırkar akçeden kırk yedi bin altı yüz akçe duvar otuz altı zirâ‘ taş duvarın zirâ‘ı kırkar akçeden beş bin dört yüz kırk akçe ki cem‘an elli üç bin kırk akçeye bâliğ olup ebniye-i mezbûrenin el-yevm meblağ-ı mezbûrdan ziyâdeye tahammülü yokdur deyü sâir ebniye ve sukūf ahvâline ıttılâ‘-ı tâmmı olan Müslimîn ile icmâ‘ ve ittifâk etmeğin mâ vaka‘a bi’t-taleb ketb olundu. Fi’l-yevmi’s-sâmin min-Şevvali’l-mükerrem li-sene seb‘a ve mie ve elf. Şuhûdü’l-hâl: Sâbıkā Tokat kadısı olan fazîletlü Mustafa Efendi, umdetü’l-müderrisîni’l-kirâm fazîletlü eş-Şeyh Mehmed Efendi, fahrü’l-müderrisîni’l-kirâm es-Seyyid Abdullah Efendi, İmâmzâde Mehmed Efendi b. Ahmed Efendi, Süleyman Efendi b. Hasan, Hasan Efendi b. Mehmed, Mustafa Efendi b. el-Hâc Mustafa, Ebûbekir Efendi b. Abdülkerim.