İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 335 Hüküm no: 241 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ömer b. Rıdvan b. Hasan’a olan borcunu varislerine ödemesi hakkında Tekfurdağlı Nikola v. Komyinoz’a tembihte bulunulduğu Hadâik-i Sultânî’de vâki‘ hâssa bostanlarına odabaşı oldukdan sonra Demirkapı kurbünde Elvanzâde mahallesinde sâkin iken bundan akdem vefât eden el-Hâc Ömer b. Rıdvan b. Hasan nâm kimesnenin verâseti zevce-i metrûkesi Havva Hatun bt. el-Hâc Mustafa ile sulbiye sagīre kızları Fâtıma ve Afife’ye münhasıra olup ba‘dehû mezbûre Afife dahi fevt olup verâseti vâlidesi mezbûre Havva Hatun ile li-ebeveyn kız karındaşı sagīre-i mezbûre Fatma’ya münhasıra olduğu şer‘an zâhir ve müte‘ayyen oldukdan sonra sagīre-i mezbûre Fatma’nın tesviye-i umûruna kıbel-i şer‘den mansûb vasîsi ve mezbûre Havva Hatun’un li-ebeveyn ammi ve tarafından husûs-ı âti’z-zikre vekîli olduğu zât-ı mezbûreyi ma‘rifet-i şer‘iyye ile ârifân Osman Ağa b. Mehmed ve Hasan Bey b. Abdullah şehâdetleriyle şer‘an sâbit olan râfi‘ü hâze’l-kitâb el-Hâc Cafer Ağa b. Mehmed dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i âlîde bakkāl tâifesinden Tekfurdağlı Nikola v. Komyinoz nâm zimmî muvâcehesinde üzerine da‘vâ ve takrîr-i kelâm edip müteveffâ-yı merkūm el-Hâc Mehmed Ağa bin yüz beş senesi Zilhicceti’ş-şerîfesi’nin on beşinci günü hâl-i hayatında bin beş yüz on iki vakıyye kahvesini mezkûr Nikola’ya iki bin dört yüz guruşa bey‘ u teslîm ol dahi iştirâ ve kabûl ve tesellüm ve kendi mesârifine sarfla istihlâk etmekle semen-i mezbûr iki bin dört yüz guruş zimmetinde edâsı lâzım deyni olup deyn-i mezbûru nâtık ve hatt u hatmini hâvî işbu temessükü mezbûr el-Hâc Ömer Ağa’ya verdikden sonra meblağ-ı mezbûrun yüz on iki guruşunu medyûn-ı merkūm Nikola bostanını Kara İbrahim yediyle merkūm el-Hâc Ömer Ağa’ya edâ ve teslîm ol dahi ba‘de’l-ahz mâ‘adâsı olan iki bin iki yüz seksen sekiz guruşunu kable’l-ahz mezbûr el-Hâc Ömer Ağa fevt olup bi’l-irsi’ş-şer‘î müvekkilem mezbûre Havva ile sagīre-i mezbûr[eye] isâbet etmeğin hâlâ taleb eylediğimde edâdan imtinâ eder suâl olunup meblağ-ı mezbûr iki bin iki yüz seksen guruşu bana edâya mezbûr Nikola’ya tenbîh olunmak matlûbumdur dedikde gıbbe’s-suâl mezbûr Nikola cevâbında fi’l-hakīka müteveffâ-yı mezbûr el-Hâc Ömer Ağa’ya temessük-i merkūm nâtık olduğu üzere zikrolunan kahve bahâsından iki bin dört yüz guruş zimmetimde edâsı lâzım deynim olup lâkin meblağ-ı mezbûrdan müteveffâ-yı mezbûrun hayatında kabza mu‘terîf olunan yüz on iki guruşdan mâ‘adâ bin yedi yüz guruşunu nakd müteveffâ-yı mezbûra hayatında edâ ve teslîm ve altı yüz guruşluk zahîremi def‘ u teslîm ol dahi ahz u kabz edip ol vechile meblağ-ı mezbûr iki bin dört yüz guruşu tamamen edâ ve teslîm eylediğimden sonra on iki guruşum ziyâde geçmişdir deyü def‘le mukābele edicek gıbbe’l-istintâk ve’l-inkâr merkūm Nikola’dan def‘-i mezbûra mübeyyene beyyine taleb olundukda ikāmet eylediği Acem Hasan nâm şahıs telbîs ve şehâdet-i zûr ile meşhûr olduğu Dîvân-ı âlî’de sikāt ihbârlarıyla müte‘ayyen olmağla şehâdeti makbûle olmayıp şâhid-i âhar ikāmesi içün istimhâl etmekle kirâren ve mirâren mehl-i şer‘î birle ba‘de’l-imhâl ityân-ı beyyineden izhâr-ı acz edip ve kebîre olan müvekkile-i mezbûreyi tahlîfe tâlib olmamağın mûcebiyle meblağ-ı merkūm iki bin iki yüz seksen sekiz guruşu müdde‘î-i mezbûra edâya mezbûr Nikola’ya tenbîh olunup mâ hüve’l-vâki‘ bi’t-taleb ketb olundu. Fi’l-yevmi isnâ aşar min-şehr-i Şevvali’l-mükerrem li-sene seb‘a ve mie ve elf. Şuhûdü’l-hâl: Umdetü erbâbü’t-tahrîr ve’l-kalem Yusuf Efendi tezkire-i evvel, zübdetü ashâbi’t-tastîr ve’r-rakām Hâfız Efendi tezkire-i sânî, fahrü’l-eşbâh ve’l-a‘yân Mustafa Ağa odabaşı, umdetü’l-a‘yân ve’l-akrân Mehmed Ağa Ser-çavuşân, el-Hâc Halil Efendi b. Mehmed, Mehmed Ağa b. Abdullah, Mehmed Efendi b. Hüseyin, Ali Beşe b. ( ).