İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 336 Hüküm no: 242 Orijinal metin no: [76b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Garib v. Bektaş’ın Ankara Vâlisi Mustafa Paşa b. Ahmed’deki alacağının tahsili Mahmiye-i İstanbul’da Hoca Hanı’nda sâkin tüccârdan Garib v. Bektaş nâm zimmî meclis-i şer‘-i şerîf-i enverde işbu râfi‘ü’l-vesîka Hıdır v. Ağya nâm zimmî muvâcehesinde ikrâr ve takrîr-i kelâm edip hâlâ Ankara vâlîsi emirü’l-ümerâ’il-kirâm izzetlü Mustafa Paşa b. Ahmed zimmetinde kendi hatm [hatt] ve hatmini hâvî işbu deyn temessükü nâtık olduğu üzere cihet-i deyn-i şer‘îden yedi bin yedi yüz yetmiş guruş hakkım olup meblağ-ı mezbûre paşa-i mûmâ-ileyhin dîvân efendisi Hüseyin Efendi b. Ali ve hazînedârı [77a] işbu Mehmed Bey b. Abdullah ve oğulluğu Yahya b. Abdullah kefâlet-i sahîha-i şer‘iyye ile kefîller olup meblağ-ı mezbûrun üç bin beş yüz guruşu ile mukaddemâ beni Yasef nâm zimmî üzerine havâle edip ben dahi kabûl etmekle dört bin iki yüz yetmiş guruş hakkım bâkī kalmışdı hâlâ meblağ-ı bâkī-i mezbûr dört bin iki yüz yetmiş guruşu küfelâ-yı mezbûrûndan taleb ve da‘vâ eylediğimde meblağ-ı mezbûru mahmiye-i mezbûrede edâya bir vechile iktidârları olmamağla medîne-i Ankara’ya varıp paşa-i mûmâ-ileyhden tahsîl ve bana teslîmi ta‘ahhüd ve iltizâm etmeleriyle ben dahi meblağ-ı mezbûr dört bin iki yüz yetmiş guruşu medîne-i mezbûreye varıp paşa-yı mûmâ-ileyhden taleb ve ahz u kabza ve bana îsâle tarafımdan mezbûr Hıdır’ı vekîl ve nâib-i menâb nasb u ta‘yîn edip ol dahi vekâlet-i mezbûreyi kabûl ve merâsimini edâya ta‘ahhüd eyledi dedikde gıbbe’t-tasdîkı’ş-şer‘î mezbûrûn Hüseyin Efendi ve Mehmed Bey ve Yahya ile Mataracı Hüseyin b. Hasan ve etbâ‘ından Musa b. Mehmed nâm kimesneler meclis-i şer‘de takrîr-i kelâm edip vekîl-i mezbûr Hıdır medîne-i mezkûreye varıp meblağ-ı mezbûru paşa-i mûmâ-ileyhden da‘vâ eyledikde kendüye bir tarîk ile zarar isâbet etmemeğe kefîl olup meblağ-ı mezbûru ber-vech-i muharrer paşa-yı mûmâ-ileyhden tahsîl ve vekîl-i mezbûra teslîme ta‘ahhüd eyledik dediklerinde mâ hüve’l-vâki‘ hıfzan li’l-makāl bi’t-taleb ketb olundu. Fi’l-yevmi’s-sâbi‘ ve’l-ışrîn min-şehr-i Ramazani’l-mübârek li-sene seb‘a ve mie ve elf. Şuhûdü’l-hâl: Ebûbekir el-mübâşir, Ali Ağa b. el-Hâc Yusuf, İsmail Çelebi b. Mehmed, el-Hâc Süleyman b. Abdullah, Hacı Mustafa b. Hüseyin.