İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 338 Hüküm no: 244 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia Hatun’un kocası Mustafa Ağa b. Nizameddin’den muhâlaa yoluyla boşandığı Mahmiye-i İstanbul’da Emin Bey mahallesi sâkinlerinden olup zâtını ma‘rifet-i şer‘iyye ile ârifân birâderi Ali Ağa b. el-Hâc Mehmed Ağa ve Ömer Beşe b. Mustafa Çelebi ta‘rîfleriyle mu‘arrefe olan Râbia Hatun bt. el-Hâc Mehmed Ağa meclis-i şer‘-i şerîf-i enverde zevc-i muhâla‘ı işbu râfi‘ü’l-kitâb Mustafa Ağa b. Nizâmeddin mahzarında ikrâr ve takrîr-i kelâm edip zevcim mezbûr Mustafa Ağa zimmetinde mütekarrer ve ma‘kūdün aleyh olan on sekiz bin akçe mehr-i mü’eccelim ve nafaka-i iddetim üzerlerine ve me’ûnet-i süknâm dahi kendi üzerime ve mezbûrun firâşından hâsıla ve benden mütevellide Fâtıma nâm sagīreyi dokuz yaşına tekmîl edince kendi malımdan infâk etmek üzere zevcim merkūm Mustafa Ağa ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru ba‘de’l-kabûl hukūk-ı zevciyete ve târih-i kitâba gelince beynimizde cereyân eden sâir hukūka müte‘allika da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik min-ba‘d birbirimiz ile vechen mine’l-vücûh da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min-Şevvali’l-mükerrem li-sene seb‘a ve mie ve elf. Şuhûdü’l-hâl: Musa Efendi b. Davud el-imâm, Mehmed Çelebi b. Ahmed esirci, Mustafa Çelebi b. ( ) alucı?, usturacı İbrahim Çelebi b. ( ), Mustafa Çelebi b. Veli, İbrahim Ağa b. Abdurrahman, Ömer Beşe b. Mustafa, Mehmed Bey b. Mustafa, Hüseyin Çelebi b. Abdullah, Bayram Bey b. Hasan, Mehmed Ağa b. Abdullah el-mübâşir, İbrahim Çelebi b. Ahmed, Ali b. Bali ve gayruhum.