İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 339 Hüküm no: 245 Orijinal metin no: [77b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Abdülkerim’in Rus asıllı kölesi Mustafa b. Abdullah’ı mükâtebe yoluyla azat ettiği Mahmiye-i İstanbul’da Keçeci Pîrî mahallesi sükkânından el-Hâc Süleyman b. Abdülkerim nâm kimesne meclis-i şer‘-i şerîf-i enverde kendüye rıkkını mu‘terîf[e] olan işbu orta boylu açık kaşlı sarı elâ gözlü Rusiyyü’l-asl hâmil-i hâze’l-kitâb Mustafa b. Abdullah mahzarında ikrâr-ı tâm ve takrîr-i kelâm edip mevsûf-ı mezbûr Mustafa beher yevm ikişer para olmak üzere ayda altmışar paradan târih-i kitâb şehri gurresinden bir sene tamamına değin bana on sekiz guruş verip ba‘dehû malımdan âzad olmak üzere kitâbete kat‘ edip mevsûf-ı mezbûr Mustafa dahi ber-vech-i meşrûh kitâbet-i mezbûreyi kabûl ve meblağ-ı mezbûru vech-i muharrer üzere müddet-i madrûbe tamamına değin bana edâ ve teslîm eylediğinden sonra mevsûf-ı mezbûr Mustafa sâir ahrâr-ı asliyyîn gibi hür olsun dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî aşar min-Şevvali’l-mükerrem li-sene seb‘a ve mie ve elf. Şuhûdü’l-hâl: Fahrü’l-müderrisîni’l-kirâm Uşşâkīzâde es-Seyyid İbrahim Efendi, umdetü’l-müderrisîni’l-kirâm Abdurrahman Efendi, Hasan Beşe b. Mehmed el-mübâşir, Mustafa Beşe [b.] Salih, Ahmed Ağa b. Mehmed, Mustafa Efendi b. Eyüb, Mustafa Efendi b. Ahmed, Ahmed Efendi b. İbrahim Efendi el-mukayyid, Mehmed Çelebi b. Hasan, İsmail Efendi b. İbrahim, İbrahim Çelebi b. Ahmed, Kâtibi’l-hurûf Ali Efendi b. Sunullah, Ali b. Bali.