İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 340 Hüküm no: 246 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Çelebi b. Abdullah’ın vefat eden Osman Ağa b. Mehmed b. Abdullah’daki alacağının tahsili Mahmiye-i İstanbul’da Sarı Nasuh mahallesinde sâkin el-Hâc İsmail Çelebi b. Abdullah meclis-i şer‘-i şerîf-i enverde mahmiye-i mezbûrede Ali kasabasında sâkin iken bundan akdem vefât eden Osman Ağa b. Mehmed b. Abdullah’ın verâseti hasran vârisesi olup tereke-i müteveffâ-yı mezbûra vâzı‘atü’l-yed olduğu lede’ş-şer‘i’l-enver mütehakkık olan halası Hamide bt. Ömer nâm hatun tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân Abdullah Efendi b. Mehmed ve Muslu Çelebi b. Veli nâm kimesneler şehâdetleriyle şer‘an sâbit olan Mehmed Çelebi b. Mustafa mahzarında ikrâr-ı tâm ve takrîr-i kelâm edip gāib ani’l-meclis Abdullah b. Piyale zimmetinde cihet-i deyn-i şer‘iyyeden elli beş guruş hakkım olmağla müteveffâ-yı mezbûrun hayatında mezbûr Abdullah beni meblağ-ı mezbûr elli beş guruş içün mütevefiye-i mezbûrun üzerine havâle-i sahîha-i şer‘iyye ile üçümüz bir meclisde iken havâle edip her birimiz dahi havâle-i mezkûreyi kabûl etdiğimizden sonra meblağ-ı mezbûrun dokuz guruşunu ba‘de’l-havâle müteveffâ-yı mezbûrun hayatında yedinden ahz u kabz edip bâkī kırk altı guruşu kable’l-ahz fevt olmağın tereke-i müteveffâ-yı mezbûra vâzı‘atü’l-yed olan mezbûre Hamide’den taleb ve da‘vâ ve müdde‘âmı şuhûd-ı udûlle isbât edip meblağ-ı mezbûru ahz sadedinde iken muslihûn tavassut edip da‘vâ-yı mezkûremden vekîl-i mezkûr Mehmed Çelebi ile otuz guruş üzerine sulh oldukda ben dahi sulh-i mezbûru kabûl ve bedel-i sulh olan meblağ-ı mezbûr otuz guruşu vekîl-i mezbûr Mehmed Çelebi yedinden bi’t-tamam ahz u kabz edip ziyâde müdde‘âm olan on altı guruşa müte‘allika âmme-i da‘vâdan mezbûr[e] Hamide’nin zimmetini ibrâ-yı âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis aşar min-Şevvali’l-mükerrem li-sene seb‘a ve mie ve elf. Şuhûdü’l-hâl: Abdullah Çavuş b. Mehmed, Yakub [b.] Mehmed Çelebi, Abdullah Çelebi b. Mehmed, Mustafa Çelebi b. Veli, Mehmed Çelebi b. Mehmed.