İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 340 Hüküm no: 247 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panayot v. Yorgi tarafından üzerine bina yapılacak Osman Ağa’ya aid arsanın ölçümünün yapılması Husûs-ı âti’z-zikrin mahâllinde ketb ve tahrîri bâbında fermân-ı âlî vârid olmağın imtisâlen-leh savb-ı şer‘-i mutahharadan Ali Efendi b. Ali irsâl olunup ol dahi hâssa mi‘mârlardan Dede Mehmed Halîfe b. İshak ve Ali Halîfe b. Abdullah ile mahmiye-i İstanbul’da Kumkapı dâhilinde Muhsinehatun mahallesinde vâki‘ bir tarafdan Osman Ağa mülkü ve bir tarafdan Halebî Yasef zimmî mülkü ve bir tarafdan Sefer v. Kalender nâm zimmî mülkü ve bir tarafdan tarîk-i âm ile mahdûd arsa üzerine varıp zeyl-i vesîkada muharrerü’l-esâmî Müslimîn mahzarlarında akd-i meclis-i şer‘-i şerîf eylediğinde arsa-i mahdûde-i mezkûre yedinde mülk ve hakkı olan Osman Ağa b. Abdullah nâm kimesne tarafından husûs-ı âti’z-zikre vekîl olduğu Yusuf b. Abdullah ve Halil b. Abdünnebi nâm kimesneler şehâdetleriyle şer‘an sâbit olan işbu bâ‘isü’s-sifr Panayot v. Yorgi nâm zimmî meclis-i ma‘kūd-ı mezbûrda takrîr-i kelâm ve bast-ı merâm edip müvekkil-i mezbûr Osman Ağa işbu arsa-i mahdûd-ı mezkûresi üzerine binâ edivermek üzere tarafından beni vekîl ve bana emretmekle arsa-i mezbûre misâha olunup mikdârı ma‘lûm olmak matlûbumdur dedikde mi‘mâr ân-ı mezbûrân arsa-i mahdûde-i mezkûreyi bi’l-muvâcehe misâha eylediklerinde tûlen yirmi üç buçuk ve arzen on iki bi-hesâbı terbî‘î iki yüz elli sekiz zirâ‘ arsa olduğu zâhir ve nümâyân olmağın vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Mehmed Çelebi b. İbrahim ve Hasan b. Abdullah ile meclis-i şer‘a gelip alâ vukū‘ıhî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min-şehr-i Ramazani’l-mübârek li-sene seb‘a ve mie ve elf. Şuhûdü’l-hâl: Eyüb Çelebi b. Mehmed, el-Hâc Hüseyin b. Abdullah, Osman Çelebi b. Abdurrahman, Halil Çelebi b. Abdullah, Ahmed Çelebi b. Abdullah ve gayruhum mine’l-huzzâr.