İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 341 Hüküm no: 248 Orijinal metin no: [78a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Belkıs Hatun Vakfı’na aid olup İbrahim Çelebi b. Mustafa tasarrufunda bulunan kömür mahzeninin yeniden inşası Husûs-ı âti’z-zikrin mahâllinde ketb ve tahrîri bâbında fermân-ı âlî vârid olmağın imtisâlen-leh savb-ı şer‘-i mutahharadan keşf nâibimiz olan Abdurrahman Efendi b. Ali irsâl olunup ol dahi hâssa mi‘mâr lardan Dede Ali Halîfe b. Abdullah ve Osman Halîfe b. Abdülmennan ile mahmiye-i İstanbul’da Kâtib Kasım mahallesinde vâki‘ merhûm Belkıs Hatun Vakfı musakkafâtından olup bir tarafdan İsmail Çelebi b. Yusuf Çavuş mülkü ve bir tarafdan yine vakf-ı mezbûrdan Limya zimmî tasarrufunda olan bahçe ve bir tarafdan Ömer nâm kimesne mülkü ve bir tarafdan tarîk-i âm ile mahdûd kömür mahzeni üzerine varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘-i şerîf eylediğinde mahzen-i mezbûra icâre-i mu‘accele-i ma‘lûmem ve beher şehr otuz akçe icâre-i mü’eccele ile mutasarrıf olan işbu bâ‘isü’l-kitâb İbrahim Ağa b. Ali nâm kimesne meclis-i ma‘kūd-ı mezbûrda vakf-ı mezkûrun bi’l-fi‘l mütevellîsi olan İbrahim Çelebi b. Mustafa mahzarında takrîr-i kelâm ve bast-ı merâm edip mahzen-i mezbûr mürûr-ı eyyâm ve kürûr-ı a‘vâm ile müşrif-i harâb olmağla müceddeden binaya muhtâc olup cânib-i vakf-ı mezbûrdan dahi müsâ‘ade olmamağın kendi malım ile ihdâs edeceğim ebniye mülküm olmak üzere [78b] icâre-i mü’eccelesi olan beher şehr otuzar akçe üzerine on akçe dahi zam edip beher şehr cem‘an kırkar akçe olmak üzere mütevellî-i mezbûr bana izin ve yedime ber-vech-i mübeyyen müceddeden temessük vermekle hükm-i enkāzda olan işbu köhne ebniyesi keşf ve tahmîn-i sahîh ile tahmîn ve hüccet olunmak matlûbumdur dedikde gıbbe’t-tasdîkı’ş-şer‘î mi‘mârân-ı mezbûrân mahzen-i mezbûru bi’l-muvâcehe misâha eylediklerinde tûlen ve arzen bi-hesâbı terbî‘î beş yüz yirmi beş zirâ‘ sakfın zirâ‘ı on sekiz akçeden dokuz bin dört yüz elli akçe ve bi-hesâbı mezbûr otuz altı zirâ‘ tahta perde zirâ‘ı on beşer akçeden beş yüz kırk akçe ve bi-hesâbı merkūm on beş zirâ‘ tahta döşeme zirâ‘ı on sekiz akçeden iki yüz yetmiş akçe ve bi-hesâbı mezbûr yetmiş beş zirâ‘ taş duvarı ve zirâ‘ı yirmi ikişer akçeden bin altı yüz elli akçe ve bir sokak kapısı doksan akçe ki ebniye-i mezkûrenin el-yevm kıymet-i şer‘iyyeleri min-haysü’l-mecmû‘ on iki bin akçeden ziyâde değildir deyü mi‘mâr ân-ı mezbûrânla muslimûn-ı mezbûrûn icmâ‘ ve ittifâk eylediklerinde vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Mehmed Çelebi b. İbrahim ve Hasan b. Abdullah ile meclis-i şer‘a gelip alâ vukā‘ıhî inhâ ve takrîr etmeğin mâ hüve’l-vâki‘ bi’t-taleb ketb olundu. Hurrira Fi’l-yevmi’l-ışrîn min-Şa‘bâni’l-mu‘azzam li-sene seb‘a ve mie ve elf. Şuhûdü’l-hâl: Mehmed Efendi b. Hüseyin, Hüseyin Çelebi b. Abdülkadir, Hasan Çelebi b. Osman, Şaban Beşe b. Ali, es-Seyyid Yahya Çelebi b. Ahmed, el-Hâc Ahmed Ağa b. Ali.