İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 342 Hüküm no: 249 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Görevli olarak Karadeniz tarafına gönderilen Sarı Ahmed Paşa b. Ali Ağa’nın inşa ettirdiği gemisine lazım olan alet ve edevatı Halil Ağa b. Abdurrahman Ağa’dan teslim aldığı Husûs-ı âti’z-zikrin mahâllinde ketb ve tahrîri içün sâdır olan fermân-ı şerîfe imtisâlen savb-ı şer‘den irsâl olunan fahrü’l-müderrisîni’l-kirâm İbrahim Efendi b. Mehmed el-Hamîdî tersâne-i âmirede kapudan paşalara mahsûs yalı ta‘bîr olunur dîvânhânelere varılıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i Nebevî eylediğinde baştarte [baştarde] ta‘bîr olunur sefîne ile baş ve buğ olup Karadeniz tarafına memûr olan emirü’l-ümerâ’i’l-kirâm kebîrü’l-küberâ’i’l-fihâm Sarı Ahmed Paşa b. Ali Ağa meclis-i ma‘kūd-ı mezbûrda hâlâ tersâne-i ma‘mûre emîni olan umdetü’l-emâcid ve’l-ekârim câmi‘u’l-mehâmid ve’l-mekârim Yusuf Efendi b. Mustafa tarafından husûs-ı âti’l-beyâna vekîl-i şer‘î olan fahrü’l-eşbâh Halil Ağa b. Abdurrahman Ağa mahzarında ikrâr-ı tâm ve takrîr-i kelâm edip ber-mûceb-i emr-i şerîf-i âlî-şân müceddeden binâ eylediğim sefînem ile işbu sene-i mübârekede baş ve buğ olup ben Karadeniz tarafına memûr olmağla yedine verdiğim mahzen defteri mûcebince sefîne-i mezbûreye lâzım olan yüz yirmi kantar kırk bir lodra mesâmîr-i mütenevvi‘a ve altmış üç kantar ve seksen üç lodra esbâb-ı âhen ve üç yüz yirmi dokuz vakıyye baskī ta‘bîr olunur demir âlâtı ve yetmiş dokuz vakıyye mesâmîr levha ve otuz yedi vakıyye zağra ve kırk bir vakıyye meyâne ve sekiz vakıyye mismâr-ı kalafat ve on sekiz vakıyye zevrak ve yüz yirmi iki kantar zift ve beş kanta[r] ve yetmiş sekiz lodra üstübî-i beyaz ve yedi kantar ve bir lodra üstübî-i siyah ve iki yüz yirmi kıt‘a kirpas-ı bâd-bân ve yüz on kıt‘a kirpas-ı tente ve on iki vakıyye revgan-ı bezir ve altmış vakıyye revgan-ı don ve on beş aded post-ı ganem ve on altı aded çûp-ı kızılcık ve otuz üç buçuk vakıyye tahta kurşun ve yirmi sekiz aded küfe ve iki aded kûfî sagīr ve dört aded tanâb-ı alaca ve kırk iki kantar iki aded lenger ve yine yirmi iki buçuk kantar iki lenger ve on beş kantar iki zagomitne? ve yirmi üç kantar iki gomine ve bir kantar bir aded isparçine ve bir müsta‘mel palamar firkate ve on beş aded resentere? ve otuz vakıyye kırk dokuz aded tuc makara ve iki aded ladise ta‘bîr olunur ağaç ve dört yağ …? ve iki beykül? ve on aded harc-ı …? ve dört yüz varil ve bâ-fermân-ı vezîr-i mükerrem kapudan paşa yüz guruş kıymetli yaldızlı bir kebîr fener ve iki direk ve dört aded seren ve kırk dört kantar beynimizde ma‘lûm âlât-ı mütenevvi‘a ve sâir iktizâ eden kereste âlâtımızı vekîl-i mezbûr yedinden bi’t-tamam ahz u kabz etdiğimden mâ‘adâ işbu yedimde olan sadâret-i uzmâ ve vekâlet-i kübrâ kāimmakāmı olan düstûr-ı zî-şân vezîr-i âsaf-nişân sa‘âdetlü Osman Paşa hazretlerinin fermân-ı şerîfleri ve mahzen defteri mûcebince yüz otuz kirpas-ı bâd-bân ve yüz yirmi aded kirpas-ı tente ve elli aded kirpas çengâr ve otuz iki aded vesalaviş? ve beş gön ve yirmi kantar katran ve beş kantar üstübî ve kırk vakıyye revgan-ı bezir ve dokuz kantar revgan-ı don ve altmış altı vakıyye frengî sülüğen ve kırk dört vakıyye sadloz? ve beş vakıyye isfidac ve iki vakıyye çengâr ve on beş küfe ve altmış altı vakıyye şem‘-i asel ve sâir bi’l-cümle mühimmâtımızı dahi mezbûr Halil Ağa yedinden bi’t-tamam ahz u kabz eyledim dedikde gıbbe’t-tasdîkı’ş-şer‘î vaki‘-i hâli mevlânâ-yı mezbûr mahâllinde ketb ve tahrîr ba‘dehû ma‘an irsâl olunan Mehmed b. Ahmed ve Ahmed b. Ahmed ile meclis-i şer‘a gelip alâ vukû‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’r-râbi‘ min-Şevvali’l-mükerrem li-sene seb‘a ve mie ve elf. Şuhûdü’l-hâl: Başmuhâsebe Halîfesi Yusuf Efendi, Mahzen Halîfesi Mehmed Efendi b. Salih, Fazlullah Efendi, kâtib-i mahzen, Hasan Çelebi Şamârî, Mehmed Çelebi b. Mehmed, Ali Ağa b. Ahmed, el-Hâc Ömer Efendi b. Abdullah, Abdurrahman Ağa b. Abdullah, Ahmed Çelebi, Şamârî, Salih Çelebi b. Abdullah.