İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 344 Hüküm no: 250 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadırga tabir edilen gemi ile görevli olarak Karadeniz tarafına gönderilen Ali Kapudan b. Mustafa’nın gerekli alet ve edevatı temin ettiği Husûs-ı âti’l-beyânın mahâllinde ketb ve tahrîri içün sâdır olan fermân-ı şerîfe imtisâlen savb-ı şer‘den irsâl olunan fahrü’l-müderrisîn İbrahim Efendi b. Mehmed el-Hamîdî tersâne-i âmirede kapudan paşalara mahsûs yalı ta‘bîr olunur dîvânhânelere varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî eyledikde kadırga ta‘bîr olunur sefîne ile Karadeniz tarafına memûr olan hâlâ tersâne kethudâsı umdetü’l-eşbâh ve’l-ekfâ Ali Kapudan b. Mustafa meclis-i ma‘kūd-ı mezbûrda hâlâ tersâne-i mamûre emîni olan umdetü’l-emâcid ve’l-ekârim câmi‘u’l-mehâmid ve’l-mekârim Yusuf Efendi b. Mustafa tarafından husûs-ı âti’l-beyâna vekîl-i şer‘îsi olan Halil Ağa b. Abdurrahman Ağa mahzarında ikrâr-ı tâm ve takrîr-i kelâm edip ben işbu sene-i mübârekede kadırga ta‘bîr olunur sefîne ile bi’l-iktizâ Karadeniz tarafına memûr olmağın sinîn-i sâbık üzere mezbûr Halil Ağa’nın yedine verdiğim mumzâ ve mahtûm Kurşunlu Mahzen defteri mûcebince yelken ve tente ve tenteli vasara ve esbâb-ı âhen ve beynimizde ma‘lûm bi’l-cümle sâir mühimmâtımızı vekîl-i mezbûr Halil Ağa yedinden bi’t-tamam ahz u kabz eyledim dedikde gıbbe’t-tasdîkı’l-mer‘î vâki‘ hâli mevlânâ-yı mezbûr mahâllinde ketb ve tahrîr ba‘dehû ma‘an irsâl olunan Mehmed b. Ahmed ve Ahmed b. Ahmed ile meclis-i şer‘a gelip alâ vukū‘ıhî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’r-râbi‘ min-Şevvali’l-mükerrem li-sene seb‘a ve mie ve elf. Şuhûdü’l-hâl: Başmuhâsebe Halîfesi Yusuf Efendi, Mahzen Halîfesi Mehmed Efendi, Fazlullah Efendi Kâtib-i mahzen, Halil Çelebi Şamârî.