İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 344 Hüküm no: 251 Orijinal metin no: [79a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Sultan Vakfı’na ait olup Seyyid Ahmed Çelebi’nin tasarrufunda bulunan menzilin Mehmed Çelebi’ye satıldığı Mahmiye-i İstanbul’da Lâleli çeşme kurbünde Ahmed Ağa mahallesinde sâkin es-Seyyid Abdullah Çelebi b. es-Seyyid Fazlullah nâm kimesne tarafından husûs-ı âti’l-beyâna yedinde mazmûnu [mazmûn-ı] bâ‘is-i hüccet mûcebince vekîl-i şer‘îsi olan Yusuf Efendi b. Salih meclis-i şer‘-i şerîf-i enverde işbu bâ‘isü’l-kitâb yine mahalle-i mezbûre sükkânından es-Seyyid Ahmed Çelebi b. es-Seyyid İbrahim mahzarında bi’l-vekâle ikrâr-ı tâm ve takrîr-i kelâm edip arsanın tevliyet ve süknâsı ashâb-ı hayrâtdan merhûme Safiye Sultân’ın sâdât-ı kirâmdan meskene muhtâc olan bir kimesneye meşrûta vakfı olmağla mûcib-i şart-ı vâkıfa müvekkilim mezbûr es-Seyyid Abdullah Çelebi’nin taht-ı tasarrufunda olup ebniyesi silk-i mülkümde münselik olan mahalle-i mezbûrda vâki‘ bir tarafdan tarîk-i âm ve bir tarafdan Yorganî İsmail Çelebi menzili ve bir tarafdan Mehmed Ağa menzili ve bir tarafdan Mehmed Çavuş menzili ile mahdûd tabaka-i ulyâda bir kebîr oda ve bir sagīr oda ve sofa ve dehliz ve vüstâda iki bâb oda ve sofa ve dehliz ve süflâda camcı dükkânı ve matbah ve iki kenîf ve havlu ve müşterek su kuyusunu müştemil menzilin ebniye-i memlûkesini bi-cümleti’t-tevâbi‘ ve’l-levâhık ve kâffetü’l-hukūk ve‘l merâfık tarafeynden îcâb ve kabûlü hâvî bey‘-i kat‘î ile bi’l-vekâle mezbûr es-Seyyid Mehmed Çelebi’ye üç yüz otuz guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabûl ve arsasını dahi bi’l-vekâle mezbûr es-Seyyid Ahmed Çelebi’ye bi’l-izni’ş-şer‘î meccânen ferâğ ve tefvîz ol dahi tefevvüz ve kabûl etdiğinden sonra semeni olan meblağ-ı mezbûr üç yüz otuz guruşu mezbûr es-Seyyid Ahmed Çelebi yedinden ahz u kabz eyledim ba‘de’l-yevm menzil-i mahdûd-ı mezkûrun arsa ve binâsında müvekkilim mezbûrun alâkası kalmayıp mezbûr es-Seyyid Ahmed Çelebi’nin mülk ü müşterâsıdır ve hakk-ı müfevvezi olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min-şehr-i Ramazani’l-mübârek li-sene seb‘a ve mie ve elf. Şuhûdü’l-hâl: Davudpaşa Vâizi Süleyman Efendi b. Receb, Birâderi Ahmed Efendi b. Receb, Mesih Paşa müezzini Osman Efendi b. ( ), umdetü’l-vâizîn eş-Şeyh Abdülvahhab Efendi, eş-Şeyh Veli Efendi, Müezzin Mustafa Efendi b. İbrahim, Süleyman Çelebi b. Mehmed, Mustafa Çelebi b. el-Hâc İbrahim, el-Hâc Mustafa Çelebi b. Mahmud dülbentci, Abdülkerim Efendi b. Abdurrahman.